Eır Astana ushaqtaryna 37 márte qustar soǵylǵan
ALMATY. QazAqparat - «Eır Astana» áýe kompanııasynyń ushaqtary 37 ret qustarǵa soǵylǵan, dep habarlaıdy QazAqparat tilshisi. Bul týraly áýe kompanııasynyń Korporatıvti kommýnıkatsııalar departamentiniń qyzmetkeri Tilek Ábdirahymov aıtty.
«Bıyl «Eır Astany» ushaqtary 37 ret qustarmen soqtysyty. Tek Almaty áýejaıynyń ózinde 8 ret osyndaı jaǵdaı boldy. Olardyń birinde fıýzelıajǵa zaqym keldi. Almaty-Óskemen baǵytyndaǵy KS 303 reısi keshki saǵat 18:22 shamasynda áýege kóteilý úshin jerden jyldamdyq alyp bara jatqan shaqta qustarmen soqtyǵysyp qaldy. 100 ýzel (185 km/saǵat) jyldamdyq kezinde ekıpaj ushýǵa bet alýyn toqtatty. 25 shilde kúni Beıjiń-Almaty baǵytyndaǵy KS 888 reısi tańǵy saǵat 9:11-de qustarmen soqtyǵysty. Biraq ushaqqa zaqym kelgen joq», - dedi T.Ábdirahymov.
Byltyr 72 ushaqqa qustar soǵylsa, olardyń 10-ynda áýe kemesine zaqym kelgen Saldarynan 19 reıs bógelgen. Jóndeý jumystaryna barlyǵy 850 myń AQSh dollary jumsaldy.
Áýe kompanııasynyń ókili aıtqandaı, Almaty áýejaıynyń mańyndaǵy egistikter máseleni odan ári ýshyqtyryp otyr. Dándi daqyl egistigine usaq jándikter men qustardy aýlaýǵa iri qustar kóp jınalady.
Atap aıtsaq, ushý-qoný jolaǵynyń 05R/23L osinen 400 metr qashyqta Qulja tas jolyna deıin egistikte arpa egilgen.
Ushý qoný jolaǵynyń 05L/23R osinen 400 metr qashyqta Qyzyl tý aýylynyń tas jolyna deıin egistik alqaby bar.
«Osy jaǵdaıǵa baılanysty «Eır Astana» kompanııasy ornıtologııalyq ahýalǵa QR Azamattyq avıatsııa komıteti men jergilikti atqarý organdary jáne áýejaı basshylarynyń nazaryn aýdarǵymyz keledi. Ushaqtardyń qusqa soǵylýy ushý qaýipsizdigine edáýir nuqsan keltiredi. Halyqaralyq IKAO talaptary boıynsha ári QR IDM-nyń №323 buıryǵyna sáıkes áýejaıdan 15 shaqyrym qashyqtyqqa deıin qoqys úıindisin, mal sharýashylyǵyn, mal soıý oryndaryn ashýǵa tyıym salynady», - dedi ol.
