Eır Astana ushaqtary aqyly ınternetke qosylady
ALMATY. QazAqparat - «Eır Astana» áýe kompanııasy ushaqtarynda ınternet qosylatyn boldy, dep habarlaıdy QazAqparat tilshisi.
Jolaýshylar keń jolaqty ǵalamtorǵa qol jetkizý úshin 1500-7500 teńgege deıin aqsha tóleıdi.
Áýe kompanııasynyń korporatıvti kommýnıkatsııalar departamentiniń habarlaýynsha, «Boıng-767» bortynda Inmarsat's Global Xpress (GX) Aviation jelisimen jumys jasaıtyn Rockwell Collins kabınalyq júıesi ornatyldy.
Jolaýshylar bortta planshet, smartfon, kompıýter qoldana alady.
Atap aıtqanda, "Start" paketi 15 MB - 1500 tg, "Bıznes" paketi 50 MB - 4500 tg, "Cýper" paketi 100 MB - 7500 tg bolmaq.
«Kompanııanyń basty mindetteriniń biri - jańa tehnologııalardy engizý, jerde bolsyn, kókte bolsyn jolaýshylardyń talap-tilegin oryndaý», - dedi kompanııa ókili Andreı Gýlev.
«GX Aviation - bul borttaǵy keń jolaqty ınternet baılanysyn qamtamasyz etetin biregeı ónim. «Eır Astana» mundaı qyzmetti álemde keń fıýzelıajdy ushaqtarda birinshi ret engizip otyr», - dedi Inmarsat Aviation ókili Frederık van Essen.
