«Eır Astana» ushaǵynda qomaqty qarajat urlaǵan qytaılyq áıel sottaldy
NUR-SULTAN. QazAqparat - «Eır Astana» ushaǵynda qazaqstandyqtyń qomaqty qarajatyn urlaǵan Qytaı azamatshasy ustaldy. Bul týraly Kóliktegi polıtsııa departamentinen málim etti, dep habarlaıdy QazAqparat tilshisi.
«Nur-Sultan qalasy áýejaıynyń jelilik polıtsııa bólimine 40 jastaǵy Qazaqstan azamatshasy júginip, «Eır Astana» áýe kompanııasynyń «Beıjiń-Nur-Sultan» baǵytyndaǵy áýe kemesimen ushyp kele jatqanda qol sómkesindegi 4 500 AQSh dollarynyń (1 744 290 teńge) joǵalǵanyn aıtyp shaǵymdandy. Kólik polıtsıeıleri jedel izdeý barysynda osy reıspen ushyp kelgen 1993 jyly týǵan QHR azamatshasyn anyqtap, ustady», - dep atap ótedi departamentten.
Vedomstvo málimetinshe, Qytaı azamatshasynyń sómkesin tekserip qaraý barysynda joǵalǵan 1 744 290 teńge tabylǵan.
«QHR azamatshasy kinásin tolyqtaı moıyndady. Urlanǵan aqsha tárkilenip, ıesine qaıtaryldy. Nur-Sultan qalasy Esil aýdandyq sotynyń úkimimen QHR azamatshasy Qylmystyq kodekstiń 188-baby 3-tarmaǵy 1-tarmaqshasynda kózdelgen qylmysty jasaǵany úshin kináli dep tanyldy. Oǵan shartty túrde 3 jylǵa bas bostandyǵyn aıyrý, májbúrli túrde Qazaqstan Respýblıkasynan tysqary shyǵarý, 5 jyl merzimge Qazaqstan Respýblıkasynyń aýmaǵyna kelýge tyıym salý jazasy taǵaıyndaldy» delingen taratylǵan aqparatta.
