«Eır Astana» ushaǵy Máskeý áýejaıyna shuǵyl qondy
NUR-SULTAN. QazAqparat - «Eır Astana» ushaǵy máskeýlik Sheremetevo áýejaıyna májbúrli túrde qondy, dep habarlaıdy QazAqparat tilshisi.
«28 maýsymda «Eır Astana» áýe kompanııasynyń «London-Nur-Sultan» baǵyty boıynsha KS 942 reısin oryndaǵan ushaǵy eki generatordyń biriniń isten shyǵýy saldarynan jumys istemeı turǵan QKB (qosalqy kúshtik bekitpe) jaǵdaıynda Máskeý ýaqytymen saǵat 00:18-de shuǵyl túrde qondy», - dep habarlandy kompanııanyń baspasóz qyzmetinen.
Kompanııadan habarlanyp otyrǵandaı, ushaqtyń qonýy shtatty túrde ótti.
«Qazirgi ýaqytta aqaýdy tabý jáne ony joıý boıynsha jumys júrgizilýde. Ushaqtyń ishinde bolǵan 93 jolaýshynyń bári de «Máskeý-Nur-Sultan» qosymsha reısi arqyly Máskeý ýaqyty boıynsha búgin saǵat 09:50-de ushyp shyǵady», - delingen áýe kompanııanyń habarlamasynda.
Eske sala ketsek, birneshe kún buryn Tashkent-Almaty» baǵytyndaǵy reısti oryndap kele jatqan «Eır-Astana» áýe kompanııasynyń ushaǵy qymtaý júıesindegi aqaýǵa baılanysty Shymkentke apatty jaǵdaıda qonǵan bolatyn.
