«Eır Astana» Úrimshige áýe reısteriniń jıiligin arttyrdy
ASTANA. 25 shilde. QazAqparat - Aǵymdaǵy jyldyń 1 tamyzynan bastap «Eır Astana» áýe kompanııasy Almaty-Úrimshi-Almaty baǵytyndaǵy reıster sanyn aptasyna 3-ten 7-ge deıin, al 17 qyrkúıekten bastap Astanadan Úrimshige jáne keri baǵyttaǵy ushyrylymdardy aptasyna tórt retke arttyrady.
Osylaısha, Qazaqstannan Úrimshige qatynaıtyn áýe reısteriniń sany aptasyna on birge jetedi. Ushyrylymdar óte jaıly Airbus A320 áýe kemesimen júzege asyrylady, dep habarlady kompanııanyń baspasóz qyzmetinen.
Astana-Úrimshi baǵytyndaǵy alǵashqy áýe qatynasy 2009 jyldyń qarashasynda jolǵa qoıylǵan bolatyn. Al Almaty men Úrimshi arasyndaǵy alǵashqy reıs 2010 jyldyń shildesinde qatynaǵan edi. Jalpy, Úrimshi qalasymen aradaǵy áýe qatynasy kezinde 145516 jolaýshy men 130 tonna júk tasymaldandy.
Astanadan Úrimshige ushý uzaqtyǵy 2 saǵat 45 mınýtty, al Almatydan 1 saǵat 50 mınýtty quraıdy.
