«Eır Astana» «TENGRI TRAVELSYSTEM» týrıstik kompanııasymen kelisimdi buzdy
ALMATY. QazAqparat - Ultyq áýe tasymaldaýshysy «Eır Astana» «TENGRI TRAVELSYSTEM» týrıstik kompanııasynyń bankrotqa ushyraýyna baılanysty kompanııamen kelisim shartty buzdy. Bul týraly kompanııanyń baspasóz qyzmeti habarlady.
«Eır Astana» ókilderiniń aıtýynsha, kompanııanyń tólemqabilettiligi kúmán týdyryp otyr.
Almaty men Astanadan Antalııaǵa charterlik reısterdi ushyrý týraly kelisimge 2015 jyldyń aqpanynda qol qoıylǵan bolatyn. Qujatta 31 mamyrdan 29 qyrkúıekke deıin Almatydan Antalııaǵa 53 reısti, Astanadan Antalııaǵa 37 reısti uıymdastyrý kózdelgen edi.
Qazir Astanadan tek úsh reıs, Almatydan eki reıs Antalııaǵa attandyryldy. 700-ge jýyq týrıst Túrkııaǵa jetkizilgen bolatyn.
«Eır Astana» áýe kompanııasy kelisimge sáıkes týroperator aqysyn tólemegen reısti uıymdastyrmaǵany úshin jaýapty bolmaıdy.
Alaıda, kompanııa basshylyǵy jolaýshylardy qaıta Qazaqstanǵa alyp kelý úshin reısterdi 19 maýsymǵa deıin jalǵastyrýdy uıǵardy.
9 maýsymda Antalıadan Almatyǵa josparlanǵan reıs júzege aspaıtyn boldy.
«TENGRI TRAVELSYSTEM» atalǵan reıstegi jolaýshylardy basqa reısterge aýystyrady.
Sondaı-aq, «Eır Astana» Antalıadan Almatyǵa, Astanaǵa keletin jolaýshylarǵa quny 100 dollar bolatyn arnaıy tarıf ashty. 2 jasqa tolmaǵan balalar tegin qabyldanady. Aıta keteıik, búgin «TENGRI TRAVELSYSTEM» týrıstik kompanııasy óz qyzmetin toqtatatyndyǵyn málimdegen bolatyn. 700-ge jýyq qazaqstandyq Túrkııanyń qonaq úılerinen shyǵarylyp jatyr.
Qazaqstan Týrıstik agenttikter qaýymdastyǵy japa shekken agenttikterge kómek qolyn sozý úshin úılestirý shtabyn qurdy.
Olar memlekettik organdar men áýe kompanııalary, qabyldaýshy kompanııalar, saqtandyrýshy kompanııalar, zańgerler men týroperatorlar arasynda aqparattyq almasýdy jeńildetpek. Atalǵan derekke baılanysty Qazaqstan Týrıstik agenttikter qaýymdastyǵy Almatyda saǵat 15:00-de baspasóz konferentsııasyn ótkizbek.
