«Eır Astana» ókilderi ushqyshtar men mehanıkterdiń jetispeıtinin aıtty
ALMATY. QazAqparat - «Eır Astana» kompanııasynyń ókilderi kásibı sheber ushqyshtar men tehnıkalyq qyzmet kórsetetin mamandarǵa muqtaj. Bul týraly atalǵan áýe kompanııasynyń mamandary ótkizgen baspasóz máslıhatynda belgili boldy, dep habarlaıdy QazAqparat tilshisi.
«Biz tehnıkalyq qyzmet salasy boıynsha mamandarǵa asa muqtajbyz. Qaýipsizdiktiń halyqaralyq talaptary boıynsha jumys istep jatqandyqtan bizge kásibı deńgeıi joǵary mamandar kerek», - dedi «Eır Astana» AQ-nyń prezıdenti Pıter Foster.
Osyǵan baılanysty áýe kompanııasy avıatehnıkterdi daıarlaý boıynsha óz baǵdarlamalaryn iske qospaq. Sonymen qatar, áýe kompanııasy ushqyshtardy daıarlaý baǵdarlamasy aıasynda olardy Ispanııa, Irlandııa elderine oqytpaq, sondaı-aq, bortserikterdi Germanııa men Anglııada oqytýdy josparlap otyr.
«Biz Sizderdiń nazarlaryńyzdy áýe mamandyqtaryna aýdarǵymyz kelip otyr. Bizde eshqandaı tájirıbesi, eńbek ótili joq kez kelgen qazaqstandyq óz baǵyn synap kóre alady. Ómirińizdi avıatsııamen baılanystyrsańyz, qyzyqty bolary sózsiz, ári eń qajetti mamandyq ıesi atanar edińiz», - dedi «Eır Astana» AQ ákimshilik máseleler men personaldardy basqarý basqarmasynyń vıtse-prezıdenti Evgenııa Nı.
Búgingi tańda áýe kompanııasynda 5 myń adam eńbek etedi. 31 áýe kemesi bar. Áýe kompanııasy aldaǵy 10 jylda ushaqtar sanyn 64-ke, 2020 jylǵa deıin jumysshylar sanyn 11 paıyzǵa arttyrýdy josparlap otyr.
