«Eır Astana» kompanııasynyń áýeparki Boeing-767 ushaqtarymen tolyqty

ASTANA. 13 jeltoqsan. QazAqparat - Búgin «Eır Astana» áýe kompanııasy kópshilik nazaryna jańadan satyp alynǵan Boeing 767-300ER áýelaınerlerin usyndy. Bul týraly «Samuryq-Qazyna» UÁQ-nyń saıtynda habarlandy.

2012 jyly aqpan aıynda Qazaqstannyń kóliktik salasyn damytý strategııasy aıasynda «Eır Astana» 3 birlik Boeing-767 ushaǵy men 3 birlik Boeing-787-8 Dreamliner áýelaınerlerin satyp alý jóninde kelisimshart jasasty. Úshinshi Boeing-767 ushaǵy kelesi jyly jetkizilmek. Al 2017 men 2019 jyldary Boeing 787 áýelaınerlerin satyp alý josparlanýda.

«Boıng 767 ushaqtarynyń kelýi eki jyl buryn Airbus pen Embraer ushaqtarynyń satyp alýynan keıingi «Eır Astana» áýe kompanııasynyń parkin jańartýǵa baǵyttaǵan eleýli qadamy», - deıdi «Eır Astana» prezıdenti Pıter Foster.

Onyń aıtýynsha, «Eır Astana» álemdegi eń jas áýeparkke ıe kompanııalardyń tizimine enedi. Onyń ıeligindegi áýekólikterdiń ortasha jasy 6 jyl.

Alys qashyqtyqqa arnalǵan Boeing-767 ushaqtarynda 30 bıznes-sanattaǵy jáne 193 ekonom-sanattaǵy oryndar bar. Jańa ushaqtar Boeing 767 P4-KCA jáne Boeing 767 P4-KCB áýelaınerlerin almastyrmaq. Ushaqtar Almaty, Astana jáne Atyraýdan Bangkokke, Beıjińge, Gonkongqa, Kýala-Lýmpýrge, Frankfýrtqa jáne Amsterdamǵa qatynaıtyn bolady.