«Eır Astana» kompanııasynyń áýe kemesi elorda áýejaıyna májbúrli qondy
ASTANA. 22 tamyz. QazAqparat - «Eır Astana» kompanııasynyń áýe kemesi elorda áýejaıyna májbúrli qondy. Bul týraly QazAqparat tilshisin «Eır Astana» kompanııasynyń qoǵammen baılanys jónindegi úılestirýshisi Tilek Ábdirahımov málim etti.
«2013 jyldyń 21 tamyz kúni keste boıynsha saǵat 18:50-de Astana-Almaty baǵytyndaǵy KC954 reısti oryndaıtyn Boeing 767 áýe kemesi jolaýshylar salonynyń tútindeý kúdigine baılanys áýejaıǵa qaıta qondy», - dei ol.
Onyń atap ótýinshe, ushaqtyń qonýy shtattyq rejimde júzege asyrylǵan. Osydan keıin avıakompanııanyń ınjenerlik qyzmeti ushaq aqaýyn izdeýge kirisken.
«Júrgizilgen jumystardyń nátıjesinde ushaqtyń eki jeldetkish júıesiniń biri isten shyqqandyǵy belgili boldy. KC954 reısiniń jolaýshylary Almatyǵa 7 saǵattan keıin rezervtik ushaqpen jóneltildi. Aqaý jóndelip, QR Azamattyq avıatsııa komıtetiniń ruqsaty alynǵannan keıin áýe kemesi ushý kestesi josparyna sáıkes reısterdi oryndaý úshin qatarǵa qosyldy», - dedi kompanııa ókili.
