«Eır Astana» kompanııasy Almaty men Gonkong arasynda jańa áýe reısin ashady
ALMATY. 27 tamyz. QazAqparat -«Eır Astana» áýekompanııasy 28 tamyzdan bastap Almaty-Gonkong baǵytynda jańa reıs ashady. Ol aptasyna eki márte júrgiziledi.
Onda jolaýshylar bıznes-klastaǵy-16, ekonom-klastaǵy 150 oryndyq Boeing 757 ushaǵymen óz saparyn jasaýǵa múmkindigi bar. Ushaq Almatydan saǵat 01.35-te ushyp shyǵyp, Gonkongqa saǵat 09.45-te (jergilikti ýaqyt) qonady. Al Gonkongtan saǵat 22.15-te kókke kóterilip, Almatyǵa tańǵy saǵat 03.25-te qonady. Ushý uzaqtyǵy Almatydan Gonkongqa - 6 saǵat 10 mınýt bolsa, Gonkongtan Almatyǵa 7 saǵat 10 mınýtty quraıdy.
Jalpy Qazaqstan turǵyndary Gonkongqa 14 kúnge deıin vızasyz bara alady. Gonkongqa saıahattaıtyn jolaýshylar seriktes áýekompanııalar arqyly Makao, Manıla, Gýanchjoý jáne Ońtústik Shyǵys Azııanyń basqa qalalaryna yńǵaıly túıisý reısterimen jete alady. Munda TMD elderinen ushatyn jolaýshylarǵa da yńǵaıly túıisýler qarastyrylǵan. Almatydan Gonkongqa baryp-qaıtýdyń eń tómengi baǵasy avıabılet pen ózge de alymdardy qosqanda ekonom-klasta - 83 225 teńgeni, al bıznes-klasta 338 227 teńgeni quraıdy.
