«Eır Astana» áýe kompanııasynyń Eýroodaq elderine ushyrýlaryna qatysty barlyq shekteýler alynyp tastaldy
ASTANA. QazAqparat - 2015 jylǵy 10 jeltoqsanda Eýropalyq komıssııa EO-qa ushý qaýipsizdiginiń Tizimin jańartty. Oǵan sáıkes EO elderine ushýǵa tyıym salynǵan avıkompanııalar tiziminen «Eır Astana» áýe kompanııasy alynyp tastalǵan, dep habarlaıdy QR IDM Azamattyq avıatsııa komıtetinen.
Budan buryn bul áýe kompanııasyna EO elderine ushý baǵdarlarynyń geografııasyn keńeıtýge shekteý qoıylǵan bolatyn, «Eır Astana» 2009 jylǵy shildege deıingi (IKAO-nyń aýdıtine deıin) belgilengen mekenderge ǵana jáne ushyp júrgen áýe kemeleri túrlermen ǵana ushýǵa quqyly bolatyn. 2014 jyly áýe kompanııasynan ushý geografııasyn keńeıtý jónindegi shekteýler alynyp tastalǵan bolatyn. Osy jolǵy jańartylǵan tizim boıynsha barlyq shekteýler, onyń ishinde áýe kemelerin paıdalanatyn túrlerine shekteý qoıý da alynyp tastaldy. EO-tyń kólik jónindegi komıssary V.Býlk hanym alty jylǵy jumystyń nátıjesinde áýe kompanııasynyń EO-ǵa ushý qaýipsizdiginiń tiziminen alynyp tastalǵanyna qanaǵattanǵanyn bildirdi. EO-tyń ushý qaýipsizdiginiń tizimin Eýropalyq komıssııa atalmysh Eýroodaqtyń áýe keńistiginiń qaýipsizdigin qamtamasyz etý maqsatynda qalyptastyrady. Mundaı tizim alǵash ret 2006 jyly Eýrokomıssııanyń № 474/2006 Erejeler jınaǵy negizinde jarııalanǵan bolatyn. Tizimge eýropalyq sarashylardyń pikirinshe avıatsııalyq qaýipsizdikti qamtamasyz etýdiń máselelerin tıisti dárejede sheshpeı júrgen álemdegi kommertsııalyq avıakompanııalar, sonymen birge Eýropalyq odaqqa múshe elderdiń kez-kelgeniniń áýe keńistiginde bolýǵa tyıym salynǵan ushaqtar engiziledi. EO-tyń ushý qaýipsizdiginiń tiziminde burynǵysynsha 19 qazaqstandyq avıakompanııa qalyp qoıýda.
