«Eır Astana» áýe kompanııasy jyl sońyna deıin óz parkin 5 Airbus A320 laınerimen tolyqtyrmaq

Bul týraly búgin atalǵan kompanııanyń prezıdenti Pıter Foster elordada uıymdastyrylǵan baspasóz máslıhaty barysynda málim etti.

«Biz ózimizdiń áýe flotymyzdy arttyrý jumystaryn jalǵastyrýdamyz. Ótken aptada biz jetinshi Embraer 190 laınerimizdi aldyq. Sondaı-aq taıaýda ǵana birinshi Airbus A320-ny alǵan edik. Osy jyldyń mamyr, shilde jáne qarasha aılarynda biz ornalastyrylǵan tapsyrys aıasynda kelesi úsh Airbus A320, al qyrkúıek pen qazanda taǵy ekeýi keledi dep kútýdemiz», - dedi P.Foster.

Onyń atap ótýinshe, kompanııa jolaýshylar legin arttyrý baǵytynda jumystaryn jalǵastyratyn bolady. Máselen, ótken jyly jolaýshylar sany 14 paıyzǵa artsa, aǵymdaǵy jyly kompanııa Astana-Kıev, Almaty-Kıev áýe baǵyttarynyń ashylýyna oraı bul kórsetkish óse túetindigine senimdi. Sonymen qatar, «Eır Astana» taıaý aralyqta Astana-Orynbor, Atyraý-Máskeý baǵyttaryn ashýdy da josparlaýda.