«Eır Astana» áýe kompanııasy ushý qaýipsizdiginiń álemdik standarttaryna sáıkestigin rastady
ALMATY. 13 qyrkúıek. QazAqparat - «Eır Astana» áýe kompanııasy IOSA (IATA Operational Safety Audit) Áýe kóligi halyqaralyq uıymynyń paıdalanylý qaýipsizdigi boıynsha kezekti tórtinshi aýdıtin sátti ótkizip,
ushý qaýipsizdiginiń álemdik standarttaryna sáıkestigin rastady. «Eır Astana» IOSA-nyń barlyq aýdıtterin 2007 jyldan bastap sátti ótken Qazaqstandaǵy jalǵyz áýetasymaldaýshy bolyp tabylady. Kompanııanyń baspasóz qyzmetiniń habarlaýynsha, 16-20 mamyr kúnderi ICF SH&E halyqaralyq aýdıtorlyq kompanııasymen ótkizilgen aýdıt barysynda qujattamanyń jáne IOSA-nyń 1000 jýyq standarttarynyń oryndalýy tekserildi. Bul standarttar uıymdyq qurylymdy jáne kompanııany basqarýdy, ushýdy uıymdastyrýdy, ushýdy basqarýdy jáne dıspetcherlik qyzmetti, ushaqtarǵa ınjenerlik-tehnıkalyq qyzmet kórsetýdi, ushý qaýipsizdigin qamtamasyz etýdi, ushaqtarǵa jerde qyzmet kórsetýdi, júk tasymaldaý jáne avıatsııalyq qaýipsizdikti qamtamasyz etýdi qamtyǵan. Aýdıt nátıjeleri áýe kompanııasynyń ushý qaýipsizdigin basqarý júıesi IOSA halyqaralyq talaptaryna tolyq sáıkestigin kórsetti. «Ushý qaýipsizdigi jáne qyzmetter sapasynyń deńgeıin únemi arttyrý (IOSA) bizdiń komandamyzdyń árbir múshesi úshin basymdyq jáne IOSA-ny sátti ótkizý osyny taǵy da aıǵaqtady. Qaýipsizdik biz úshin negizgi qundylyq bolyp tabylady jáne biz halyqaralyq standarttardy saqtaý jáne sapa men táýekelderdi basqarý arqyly óndiristik qyzmetimizdiń odan ári jetilýine umtylamyz», - deıdi «Eır Astana» AQ prezıdenti Pıter Foster.
