«Eır Astana» áýe kompanııasy ushqyshtar daıyndaý ortalyǵyn ashýdy josparlap otyr
ALMATY. Naýryzdyń 31-i. QazAqparat /Názıra Eleýhan/ - Qazaqstanda jaqyn arada ushqyshtar daıyndaý jáne jattyqtyrý ortalyǵy ashylady. Ol úshin «Eır Astana» áýe kompanııasy Eırbas A-320 áýe kemeleriniń pılottaryn jattyqtyrýǵa arnalǵan EVPT jetilgen vırtýaldy trenajerin satyp aldy. Bul jeke jattyqtyrý ortalyǵyn ashýdaǵy birinshi qadam.
Bul týraly búgin Almatyda jýrnalıstermen ótken kezdesý barysynda «Eır Astana» áýe kompanııasynyń ókilderi málim etti, dep habarlaıdy QazAqparat.
Bunymen qatar, ulttyq tasymaldaýshy óziniń nusqaýshylaryn daıyndaý boıynsha oqý baǵdarlamany amerıkandyq Delta áýe kompanııasynyń halyqaralyq ushý ortalyǵynda júzege asyra bastaǵanyn málimdedi. Búgingi kúni ol jerde daıyndyqtan ótip jatqan pılottardyń segizi sertıfıkattaryn alǵan. Jýyrda osyndaı daıyndyqtan 50 adam ótedi dep josparlanýda dedi kompanııa ókilderi.
«Óz jattyǵý ortalyǵyn ashýǵa Qazaqstanda bilikti ushqysh kadrleri tapshylyǵy jáne ozyq ushýǵa jattyqtyrý trenajerlary, ushaqtarmen jaraqtalǵan halyqaralyq standarttarǵa jáne qazirgi talaptarǵa saı oqytý keshenderiniń joqtyǵy sebepker bolyp otyr. «Eır Astana» pılottarǵa qatań talaptar qoıyp otyr, óıtkeni ulttyq tasymaldaýshynyń basym baǵyty - ushý qaýipsizdigi", dedi «Eır Astana» AQ pılottar qyzmetiniń bas menedjeri Tom Hellam.
«Aerosım» kompanııasy daıyndaǵan EVPT jetildirilgen vırtýaldy trenajer sensorlyq qalqany bar jalpaq panelden turady, oǵan áýe kemesiniń ártúrli saımany - qozǵaltqyshty basqarý tetigi, avtopılot paneli, basqarý jáne ındıkatsııa bloktary qosylǵan. EVPT trenajeri jattyǵý ýaqytyn optımızatsııalaý jáne pılot pen ınjenerlerdi oqytý protsesin jaqsartý maqsatymen qurylǵan.
2008 jyldan bastap «Eır Astana» pılottardy alǵashqy daıyndaý baǵdarlamasyn (ab-initio) oryndaı bastady. Oǵan 18 jáne 35 jas aralyǵyndaǵy fızıka, matematıka jáne aǵylshyn tilin jaqsy biletin Qazaqstan azamattary qatysa alady. Búgingi tańda baǵdarlama aıasynda Florıda tehnologııalar Instıtýty janyndaǵy RTS bedeldi amerıkandyq ushý kolledjinde elimizdiń 24 bolashaq ushqyshtary oqýda, olardyń arasynda jalǵyz qyz Polına Pavlova bar.
