«Eır Astana» áýe kompanııasy reıster sanyn ulǵaıtý maqsatynda «Embraer 190» ushaǵynyń altaýyn satyp almaq

Bul týraly búgin Almatyda «Eır Astana»: tabysqa toly 9 jyl, jańa laınerler, Eýrazııa kindiginen taraıtyn jańa baǵyttar» atty taqyrypta ótken arnaıy baspasóz máslıhatynda belgili boldy.

"Eır Astana" AQ-nyń prezıdenti - Pıter Fosterdiń aıtýynsha, ústimizdegi jyly atalmysh ushaqtardyń úsheýi operatsııalyq lızıngke, 2012 jyly ekeýi menshik qarajatyna, bireýi operatsııalyq lızıngke alynbaq. "Alǵashqy «Embraer 190» ushaǵy Almatyǵa 30 sáýirde ákelinip, ishki baǵyttarda turaqty reıster oryndaýǵa kiristi. Atap aıtqanda, Almatydan Qaraǵandyǵa, Pavlodarǵa, Aqtaýǵa jáne Atyraýǵa, al Ortalyq Azııadaǵy aımaqtyq baǵyttarda - Almatydan Tashkentke, Tájikstan astanasy Dýshanbege jáne Qyrǵyzstan astanasy Bishkekke ushýda. Reısterdi oryndaý úshin Parıjde Ushý qaýipsizdigi halyqaralyq ortalyǵynda 23 ushqysh arnaıy oqýdan ótti. Jańa pılottardyń oqýy odan ári jalǵasa beretin bolady. Aldaǵy ýaqytta avıalaınerlerdiń sanyn odan ári ulǵaıta beretin bolamyz. Almatydan Azııa men Eýropa elderine alys qashyqtyqqa áýebaılanystardy kóbeıtemiz. Bul oraıda aıta ketetin jaıt, aǵymdaǵy jyldyń 2 maýsymynda Grýzııa astanasy Tbılısı qalasyna jáne Reseıdiń Samara qalasymen áýebaılanys ornatylatyn bolady",-dedi ol.

Onyń aıtýynsha, atalmysh ushaqtardyń jetildirilgen dızaıny, yńǵaılylyǵy, únemdililigi men tehnıkalyq qyzmet kórsetýdegi jumsalatan shyǵyndardyń azdyǵy sebepterinen tańdap alynǵan. "Embraer" ushaǵynyń ushý alystyǵy, únemdiligi, mólsherleri men jaılylyǵy kompanııanyń muqtajyna ábden laıyq",-dep atap ótti kompanııanyń prezıdenti Pıter Foster baspasóz máslıhaty barysynda.

«Embraer 190» ushaǵy -97 kisilik qyzmet kórsetýdiń eki klasterin qamtıdy. Ushýdyń barynsha alystyǵy - 4 200 shaqyrym.

Jıyn barysynda kompanııanyń 9 jyldyq qyzmetine baǵa berildi. Kompanııa prezıdenti Pıter Fosterdiń aıtýynsha, 9 jyl ishinde «Eır Astana» 14 039 696 jolaýshy tasymaldap, 173 224 astam reıs oryndaǵan. 2010 jyldyń nátıjesi boıynsha, jolaýshy syıymdylyǵy 4 paıyzǵa ósken. Tasymaldanǵan jolaýshylar sany 17 paıyzǵa artyp, 2,59 mıllıon adamdy quraǵan.