«Eır Astana» 5 ushaq satyp almaq
ALMATY. QazAqparat - «Eır Astana» áýe kompanııasy 5 Embraer E190-E2 áýe laınerin satyp alýǵa AerCap kompanııasymen uzaq merzimdi lızıngtik kelisimshartqa otyrdy, dep habarlaıdy QazAqparat tilshisi.
Ushaqtardyń aldy 2018 jyldyń tórtinshi toqsanynda jetkizilmek.
«E2 ushaqtary buǵan deıin qyzmet etip kelgen E190 ushaqtaryn aýystyrady. E190 2011 jyldan beri Qazaqstan ishki reısterinde qyzmet kórsetýde. Embraer-E190 Reseı, Kavkaz, Ortalyq Azııa, baǵyttarynda jáne ishki reısterde paıdalanylyp júr. Básekelestiktiń arta túsýine baılanysty E2 ushaqtary bizge tasymaldaıtyn jolaýshylar sanyn arttyrýǵa, ár jolaýshy ornyn 15 paıyz únemdeýge múmkindik beredi dep senemiz. Osylaısha otandyq áýe kompanııalarynyń ishinde kóshbasshylyq pozıtsııamyzdy bekite túspekpiz. AerCap kompanııasy birneshe jyldan beri bizdiń áriptesimiz bolyp keledi», - dedi «Eır Astana» kompanııasynyń prezıdenti Pıter Foster.
Aıta ketý kerek, alǵashqy Embraer-E190 2011 jyly satylyp alynǵan bolatyn.
Eır Astana turaqty reısterdi ushyrýǵa 2002 jylǵy 15 mamyrdan bastap kirise bastady.
Qazirgi tańda áýe kompanııasynda 60-qý jýyq reıs oryndalady.
Áýe flotynda Boeing 767-30 0ER, Boeing 757-200, Airbus A320, A320neo, Embraer E190 sekildi 31 ushaq bar.
