Eıfel munarasy 25 maýsymnan bastap qaıta ashylady
Eske sala keteıik, munara Frantsııada kornavırýstyń taralýyna jol bermeý maqsatynda engizilgen karantınge baılanysty úsh aıdan astam merzimge jabylǵan bolatyn.
Munara operatorlarynyń aıtýynsha, koronavırýs juqtyrmas úshin jáne kelýshiler arasyndaǵy áleýmettik qashyqtyqty saqtaý úshin munaradaǵy lıftilerdi ázirge paıdalanýǵa tyıym salynǵan. Qonaqtar shyǵys baǵanadan kóterilip, batys baǵanasynan túsiriledi.
Joǵarǵy bóligi ázirge jabyq. Óıtkeni kelýshilerdi ekinshi qabattan joǵarǵy qabatqa kóteretin lıftiler óte az. Ákimshilik kelýshilerge bıletterdi onlaın kassadan satyp alýǵa keńes beredi.
Málimdemede aıtylǵandaı, adamdar belgilengen qashyqtyqta turýy úshin edenge belgi salynady. Qonaqtar maska kıip kelýi kerek. Kún saıyn nysanda tazalaý jáne dezınfektsııa jumystary júrgiziledi.
Covid-19 ınfektsııasy taralmas úshin engizilgen karantınnen álemdegi týrıster kóp baratyn elderdiń biri Frantsııanyń týrızm ındýstrııasy qatty zardap shekti. Elde qonaq úıler, meıramhanalar, murajaılar men teatrlar jumysyn toqtatqan bolatyn.
Sonymen qatar, Frantsııa astanasyndaǵy Lývr murajaıy men Versal saraıy sııaqty kórnekti oryndar ýaqytsha jabylǵan-dy.
