Eıfel munarasynyń bir bóligi aýktsıonda 450 myń eýroǵa satyldy
ASTANA. KAZINFORM – Eıfel munarasy baspaldaǵynyń bir bóligi Frantsııadaǵy aýktsıonda shamamen 450 myń eýroǵa satyldy, dep habarlaıdy DW.
Arcurial aýktsıon úıiniń málimetinshe, satylymǵa munaranyń tarıhı burandaly baspaldaǵynyń fragmenti shyǵarylǵan.
Bıiktigi shamamen 2,7 metr bolatyn bólikte 14 basqysh saqtalǵan. Saýda bastalar aldynda onyń quny 120-150 myń eýro kóleminde baǵalanǵan.
Alaıda aty-jóni jarııalanbaǵan frantsýz kollektsıoneri eń joǵary baǵa usynyp, sırek artefakttyń ıesi atandy.
Satylǵan fragment Eıfel munarasynyń ekinshi jáne úshinshi deńgeılerin jalǵap turǵan.
Dál osy baspaldaqpen 1889 jylǵy dúnıejúzilik kórmeniń alǵashqy kelýshileri kóterilgen. Sol kórme úshin ınjener Gıýstav Eıfel áıgili munarany salǵan bolatyn.
Salmaǵy shamamen 1,4 tonna bolatyn konstrýktsııa 40 jyldan astam ýaqyt jeke kollektsııada saqtalǵan.
Aýktsıon aldynda ony Eıfel munarasyn kútip-baptaıtyn mamandar qalpyna keltirgen.
1983 jyly munarany jańǵyrtý kezinde ekinshi jáne úshinshi qabat arasyndaǵy baspaldaq bólshektelgen. Ol kelýshiler úshin qaýipti dep tanylyp, ornyna zamanaýı lıftiler ornatylǵan.
Keıin konstrýktsııa 24 bólikke bólingen.
Qazir onyń keıbir fragmentteri Azattyq músini mańynda, mýzeılerde, Japonııadaǵy jeke baqtarda jáne Dısneılend aýmaǵynda saqtaýly.
Aıta keteıik, Eıfel munarasy 1889 jylǵy dúnıejúzilik kórme úshin salynǵan. Bastapqyda ony ýaqytsha nysan retinde buzý josparlanǵan edi. Alaıda keıin munara Parıjdiń basty sımvoldarynyń birine aınalyp, álemdegi eń tanymal týrıstik oryndardyń qataryna endi.
