Eıfel munarasyndaǵy daý: áıel qyzmetkerlerdiń shettetilýinen keıin kompanııa basshysy qyzmetinen ketedi
ASTANA. KAZINFORM – SETE kompanııasynyń, ıaǵnı Eıfel munarasyn basqaratyn uıymnyń bas dırektory Patrık Branko Rýıvo osy jyldyń sońyna deıin qyzmetinen ketedi, dep habarlaıdy Kazinform agenttiginiń menshikti tilshisi.
Bul sheshim ındýıstik dinı uıym — Bochasanwasi Akshar Purushottam Swaminarayan Sanstha (BAPS) delegatsııasynyń 5 qyrkúıektegi saparyna qatysty júrgizilgen ishki tekserýden keıin qabyldanǵan.
SETE málimetinshe, delegatsııa ókilderi qonaqtardyń áıeldermen baılanysyn shekteý úshin arnaıy tártippen ekskýrsııa uıymdastyrýdy suraǵan.
Kompanııa málimdemesine sáıkes, atalǵan talaptar qabyldanǵan. Delegatsııanyń sapary kezinde Eıfel munarasyndaǵy áıel qyzmetkerlerdiń bir bóligi jumys oryndarynan ýaqytsha shettetilip, bólek bólmelerde kútýge jiberilgen. Al keıbir qyzmet oryndaryna áıelderdiń ornyna er qyzmetkerler qoıylǵan.
Tekserý nátıjesinde hattamalyq sapardy uıymdastyrý barysynda birqatar jumys tártibiniń buzylýy men kemshilikterge jol berilgeni anyqtaldy.
SETE kompanııasy áıel qyzmetkerlerdi qyzmetinen shettetpeý qajet ekenin aıtty.
Oqıǵa qyzmetkerlerdiń bir kúndik ereýilge shyǵýyna sebep boldy. Soǵan baılanysty Eıfel munarasy kelýshiler úshin jabyldy.
Qyzmetkerlerdiń aıtýynsha, berilgen nusqaýlar áıelderdi jynysyna baılanysty shettetýge, olardyń ornyn erlermen almastyrýǵa jáne elemeıtin jaǵdaıǵa túsirgen.
P.Branko Rýıvo SETE kompanııasyn 2018 jyldan beri basqaryp keledi. Ol qyzmetkerlerge joldaǵan hatynda áıelderdi jumystan shettetý týraly tikeleı nusqaý bermegenin aıtyp, soǵan qaramastan kompanııa basshysy retinde jaýapkershilikti moınyna alatynyn málimdedi.
SETE kompanııasynyń tóraǵasy Arıel Veıl uıym ishinde genderlik teńdikti nyǵaıtýǵa baǵyttalǵan oqytý baǵdarlamalary iske qosylatynyn aıtty.
Bul oqıǵa Frantsııanyń saıası ortasynda qyzý talqylandy. Parıj meri Emmanıýel Gregýar qaladaǵy tarıhı eskertkishterde de teńdik qaǵıdaty saqtalýy qajet ekenin málimdedi.
Osyǵan deıin Frantsııada oqýshylardyń narazylyq aktsııasynda 400-den astam adam ustalǵany týraly jazdyq.
