EYDU jáne 20 eldiń sarapshylary pandemııaǵa qarsy tsıfrlyq sheshimderdi talqylady
NUR-SULTAN. QazAqparat - Ázerbaıjan, Izraıl, Qazaqstan, Estonııa jáne EYDU sarapshylary pandemııa jaǵdaıynda memlekettik basqarýdyń tıimdiligi men memlekettik qyzmetterdiń sapasyn arttyrýǵa baǵyttalǵan tsıfrlyq sheshimderdi usyndy, dep habarlaıdy QazAqparat.
Astanadaǵy memlekettik qyzmet haby sessııasy Halyqaralyq ákimshilik ǵylymdary ınstıtýtynyń (IIAS, Belgııa) onlaın-konferentsııasy aıasynda 20-dan astam eldiń ókilderi qatysýymen ótti.
Astana memlekettik qyzmet haby Basqarýshy komıtetiniń tóraǵasy Álıhan Baımenov sessııany asha otyryp, karantın, áleýmettik qashyqtyq jáne qashyqtyqtan jumys isteý zamanaýı aqparattyq tehnologııalardy qoldanýdy jyldamdatqanyn atap ótti.
«Sovid-19 pandemııasy, sonymen birge, senimniń áleýmettik qundylyq qana emes, tıimdi ákimshilik kapıtal retinde de mańyzdylyǵyn kezekti márte kórsetti. Sondyqtan ınnovatsııalyq tehnologııalardyń ashyq jáne taza sheshimder qabyldaýǵa jaǵdaı jasaýy, asyra paıdalanýshylyqty boldyrmaý, sol arqyly azamattardyń quqyǵy men bostandyqtaryn qamtamasyz etýi mańyzdy», - dedi spıker.
Sondaı-aq, ol zamanaýı tehnologııalardy qoldaný ǵana emes, jańa jaǵdaıda azamattardyń quqyqtary men bostandyqtaryn qorǵaý máselelerin qamtıtyn tájirıbe almasýdyń mańyzdylyǵyn atap ótti.
Óz quttyqtaý sózinde Halyqaralyq ákimshilik ǵylymdary ınstıtýty bas dırektory Sofıan Sahraýı qurylǵanyna bıyl 90 jyl tolǵan IIAS tuǵyrnamasynda Habtyń sessııa ótkizgeni jáne áriptestigi úshin alǵys bildirdi. Ol yntymaqtastyqty memlekettik basqarý salasynda, onyń ishinde zertteý jobalary boıynsha damytýǵa qyzyǵýshylyq tanytty.
Otyrys barysynda Ázirbaıjan, Izraıl, Qazaqstan, Estonııa jáne EYDU ókilderi óz tájirıbelerimen bólisti.
Atap aıtqanda, Ázirbaıjan Elektrondyq úkimetin damytý ortalyǵy dırektory Farız Djafar azamattardy jaqyn mańdaǵy yqtımal COVID-19 tasymaldaýshylary týraly eskertetin mobıldi e-Tabib qosymshasy jáne «e-mask» respıratory sııaqty ınnovatsııalyq sheshimdermen tanystyrdy. Ol karantın jaǵdaıynda azamattardyń qozǵalysyn onlaın tirkeıtin júıege tolyǵyraq toqtaldy. Bul joba Habtyń Vırtýaldy alıansy arqyly qatysýshy-elder arasynda taratylyp, Túrkistan qalasy ákimdigi ázirbaıjandyq tájirıbeni qoldanyp, osyndaı onlaın-júıeni jasady.
Estonııa elektrondy basqarý akademııasy dırektorynyń orynbasary Hannes Astok óz sózinde jańa jaǵdaılarda kóptegen memlekettik qyzmetter ońtaılandyrylǵanyn atap ótti. Kún saıyn 1,1 mıllıonnan astam sandyq aýtentıfıkatsııa men qol qoıý úkimettik, kommertsııalyq jáne jeke operatsııalarda qoldanylady.
Sonymen qatar, «Shekarasyz ınnovatsııalar» uıymynyń (IWB, Izraıl) negizin qalaýshysy jáne basqarýshy dırektory Bennı Shlık Qazaqstannyń Izraıldegi Elshiligi qoldaýymen sessııaǵa qatysty. Ol 2019 jyly Izraıl úkimeti ár túrli saladaǵy ınnovatsııalyq sheshimderdi ázirleý jáne zertteý úshin 480 mıllıon AQSh dollary kóleminde 1650 jobany ınvestıtsııalaǵanyn atap ótti. Ol COVID-19 tsıfrly transformatsııany jyldamdatqanyn, bul memlekettik júıeni qaıta quryp, ıdeıalardy ilgerletýde jańa múmkindikterdi kórýge jol ashqanyn jetkizdi.
«Deep Knowledge Group» reıtıngi boıynsha Izraıl koronavırýstyq pandemııa jaǵdaıyndaǵy qaýipsiz elderdiń alǵashqy úshtigine kiredi. Densaýlyq saqtaý jáne qoǵamdyq qaýipsizdikti qamtamasyz etýde tsıfrly sheshimderdi qoldaný nátıjesinde tek Shveıtsarııa men Germanııaǵa jol beredi.
«Zerde» Ulttyq ınfokommýnıkatsııa Holdıngi halyqaralyq yntymaqtastyq bólimi bastyǵy Aıajan Muqanova az ýaqyt ishinde Qazaqstan Úkimetimen birlesip IT-kompanııalar 53-ten astam jobany jasaǵanyn aıtty. Tótenshe jaǵdaı kezinde azamattarǵa 13,8 mıllıonnan astam memlekettik elektrondy qyzmet kórsetilgenin aıtty.
EYDU memlekettik basqarý dırektoraty Tsıfrlyq úkimet jáne derekter bólimi saıasat máseleleri boıynsha analıtıgi Joao Vaskonselos COVID-19 saldarynan keıingi qalpyna keltirý isine tsıfrlyq memlekettik sektor serpin beretinin atap ótti. Sonymen qatar, tsıfrlyq úkimettiń damý deńgeıi ásirese qazirgi tańda memlekettik sektordyń negizgi kórsetkishi bola túsetinin atap ótti.
Sessııaǵa álemniń 20-dan astam eli memlekettik qyzmetkerleri, halyqaralyq sarapshylar, ǵalymdar – jalpy 100-den astam adam qatysty.
