EYDU Qazaqstanmen aradaǵy qatynastarǵa aıryqsha mán beredi - Markos Bontýrı
ASTANA. QazAqparat - Eldik baǵdarlama uıym úshin jáne Qazaqstan memleketine de úlken múmkindikter jasaıdy. Bul týraly búgin Qazaqstan men Ekonomıkalyq yntymaqtastyq jáne damý uıymy arasynda eldik baǵdarlamany talqylaý boıynsha semınar barysynda atalǵan uıymnyń Syrtqy baılanystar jónindegi hatshylyqtyń dırektory Markos Bontýrı málim etti.
«Qazaqstan osyndaı baǵdarlamany júrgizý úshin tańdalǵan tórt memlekettiń biri bolyp tabylady. Osy oraıda Qazaqstannyń eldik baǵdarlamasyn Ekonomıkalyq yntymaqtastyq jáne damý uıymy men Qazaqstan arasyndaǵy qatynastardy ári nyǵaıtýǵa yqpal etedi dep úmittenemiz»,-dedi ol.
M. Bontýrı uıym Qazaqstanmen kóptegen jyldar boıy jumys istep kele jatqanyn aıta kele, bul baǵdarlama yntamaqtastyqtyń jańa kezeńine bastaý bolatynyn atap ótti.
«Biz Qazaqstanmen aradaǵy qatynastarǵa aıryqsha mán beremiz. Bul turǵyda atalǵan baǵdarlama ózara tıimdi bolatynyna senimdimin. Eldik baǵdarlama uıym úshin jáne Qazaqstan memleketine de úlken múmkindikter jasaıdy. Aldaǵy alty aıda biz qazaqstandyq dostarymyzben tyǵyz baılanysta jumys isteıtin bolamyz. Osy baǵyttaǵy jumystar baǵdarlamany pysyqtaýǵa negizdeledi», - dedi ol.
Budan buryn habarlanǵandaı, búgingi kezdesýdiń basty taqyryby - Qazaqstan Respýblıkasy men Ekonomıkalyq yntymaqtastyq jáne damý uıymy arasyndaǵy 2015-2016 jyldarǵa arnalǵan yntymaqtastyqtyń eldik baǵdarlamasy jobasyn talqylaý.
Qazirgi ýaqytta Eldik baǵdarlama jobasy memlekettik basqarý, fıskaldy saıasat, básekege qabilettilik, iskerlik ahýaldy jaqsartý jáne turaqty damý syndy salalardaǵy birlesken bastamalardy júzege asyrýdy boljaıdy. Bul tizim keńeıtile túsýi múmkin. E.Dosaevtyń aıtýynsha, baǵdarlamanyń naqty mazmuny jyl sońyna deıin kelisilip, qol qoıylatyn bolady.
