Exxon Mobil Kýbadan 1 mıllıard dollardan astam ótemaqy talap etýi múmkin
ASTANA.KAZINFORM — Exxon Mobil Kýba úkimetinen tárkilengen múlki úshin 1 mıllıard dollardan astam ótemaqy talap etip, sotqa shaǵym túsire alady. Mundaı sheshimdi AQSh Joǵarǵy soty qabyldady, dep habarlaıdy Kazinform agenttiginiń menshikti tilshisi.
Bul sheshim qarjylyq qıyndyqty bastan keshirip otyrǵan Kýbaǵa AQSh tarapynan jasalatyn ekonomıkalyq qysymdy kúsheıtýi múmkin.
1996 jyly qabyldanǵan Helms-Berton zańy AQSh azamattaryna Kýba bıligi tárkilegen múlik boıynsha sotqa júginýge quqyq beredi. Alaıda bul normany burynǵy prezıdentterdiń barlyǵy derlik toqtatyp kelgen, tek Donald Tramp qana 2019 jyly onyń kúshine enýine ruqsat bergen.
Osydan keıin Exxon Mobil Kýba astanasy Gavanaǵa qarsy sotqa talap aryz túsirdi. Kompanııa ózine tıesili bolǵan júzdegen janarmaı quıý stantsııasy, munaı óńdeý zaýyty, qoımalar men oraý kásiporyndarynyń quny 1 mıllıard dollardan asatynyn málimdegen.
Sot barysynda Kýba úkimeti bul aktıvter Shetel memleketteriniń ımmýnıtetteri týraly zań aıasynda qorǵalatynyn alǵa tartty jáne Exxon kompanııasy atalǵan zańnyń ózine qoldanylmaıtynyn dáleldeýi tıis ekenin málimdedi.
Buǵan deıin aýdandyq jáne apellıatsııalyq sottar Kýba jaǵyn qoldaǵan bolatyn. Alaıda AQSh Joǵarǵy soty seısenbi kúni bul sheshimderdiń kúshin joıyp, isti qaıta qaraýǵa jol ashty.
Eske salsaq, buǵan deıin Donald Tramp Kýbany «kesh bolmaı turǵanda» AQSh-pen kelisim jasaýǵa shaqyrǵan edi.
