«Expo Shanghai-2010» kórmesinde búgin Qazaqstannyń ulttyq kúniniń resmı ashylý saltanaty ótti
ShANHAI. Maýsymnyń 5-i. QazAqparat /Rýslan Súleımenov/ - Búgin, maýsymnyń 5 -i kúni «Expo Shanghai-2010» dúnıejúzilik kórmesinde Qazaqstan pavılonynyń ulttyq kúni jarııalanyp otyr.
Qazaqstandyq pavılonnyń ulttyq kúniniń resmı ashylý rásimi Qazaqstan Respýblıkasynyń Memlekettik jalaýyn kóterýden bastaldy. Alǵysóz sóılegen Aýyl sharýashylyǵy mınıstri Aqylbek Kúrishbaev Qytaıdyń Kommertsııa mınıstriniń kómekshisi Tsıý Hýn myrza (mınıstrdiń orynbasary deńgeıindegi) bastap kelgen QHR Memlekettik keńesi ókilderine Qazaqstan Úkimetiniń atynan alǵys bildirdi.
A.Kúrishbaevtyń aıtýynsha, búginde Shanhaı álemdik kórme ındýstrııasynyń ortalyǵyna aınalyp otyr, munda ótip jatqan «Expo Shanghai-2010» kórmesine álem elderi men halyqaralyq uıymdardyń rekordtyq sany jınalýda. Qazaqstan dúnıejúzilik kórmege 2000 jyldan beri qatysyp keledi.
«Búginde, syrtqy álemge baǵyttalǵan ashyq saıasatynyń arqasynda Qazaqstan jahandyq ekonomıkaǵa tabysty yqpaldasyp keledi. Dúnıejúzilik banktiń deregi boıynsha, Qazaqstan ınvestıtsııa úshin tartymdy álemniń 20 eliniń qataryna kirip otyr», -dep atap kórsetti mınıstr óz sózinde.
Tústen keıin Qazaqstan pavılonynyń kórmelerimen tanysý sharalary ótedi. Qazaqstan pavılonynyń ulttyq kúniniń merekelik sharalary gala-kontsertpen aıaqtalady.
