EXPO isi: T. Ermegııaevtiń sybaılastary 4 jyldan 10 jylǵa deıin bas bostandyqtarynan aıyryldy
ASTANA. QazAqparat - Elordada «Astana EKSPO-2017» Ulttyq kompanııasynyń bıýdjet qarjysyn jymqyrý isi boıynsha isti bolǵan fıgýranttarǵa qatysty sot úkimi shyqty. Advokattar ol sheshimmen kelispeıdi jáne sotqa appelıatsııa bermek.
Aıan Adambaev, Oral Ibadildına men Sulambek Berkinxoev aıypty dep tanylyp, 7 jylǵa bas bostandyqtarynan aıyryldy. Qýanysh Medeýov, Murat Omarov, Valerıı Sın - 8 jylǵa, Azamat Tumataev - 10 jylǵa, Shoqan Mataıbekov, Álisher Pirmetov - 5 jylǵa, Madına Dáýletbaeva - 4 jylǵa sottaldy. Olardyń múlikteri de tárkilenetin bolady. Sonymen qatar materıaldyq jaýapkershiligi joǵary laýazymdardy atqarýǵa tyıym salyndy.
Sot barysynda 100-den astam kýáger tyńdaldy.
«Astana EKSPO-2017» Ulttyq kompanııasynyń burynǵy basshysy Talǵat Ermegııaev Astana qalasynyń qylmystyq ister jónindegi aýdanaralyq mamandandyrylǵan sotynyń úkimimen 14 jylǵa bas bostandyǵynan aıyrylǵan bolatyn. Sonymen qatar oǵan materıaldyq jaýapkershiligi joǵary memlekettik laýazymdy ıelenýge ómir boıyna tyıym salyndy jáne «Parasat» ordeni qaıtaryp alynady.
Qylmystyq iske tóraǵalyq etken sýdıa Ádilxan Shaıxıslamov búgin «Astana EKSPO-2017» Ulttyq kompanııasynyń burynǵy basshysy Talǵat Ermegııaevke qatysty sot úkimin jarııa etti.
Esterińizge sala keteıik, «Astana EKSPO-2017» Ulttyq kompanııasynyń burynǵy basshysyna QR QK-niń 176-babynyń 4-bóligindegi «b» tarmaqshasynda qarastyrylǵan aýyr qylmystardy birneshe ret qasaqana jasady degen kúdik keltirilgen edi.
Talǵat Ermegııaev 2015 jyldyń 12 maýsymynan beri úıqamaqta bolǵan edi. Aıyptaýshynyń aqparaty boıynsha, jymqyrylǵan qarajat kólemi 10,2 mıllıard teńgeni qurap otyr. Onymen birge 22 adam sot aldynda jaýap berdi. Olardyń negizgi bóligi kompanııa qyzmetkerleri bolǵan. Qylmystyq is 540 tomǵa jetip otyr.
Sot barysynda 12 aıyptalýshy tergeýmen kelisimge kelgen. 14 aıyptalýshy óz kinálaryn moınyna aldy. Ermegııaevtiń ózi kináni moıyndaýdan bas tartty.
