EXPO Goods Central Asia: 159 otandyq jáne halyqaralyq saýda markasy elordaǵa jınaldy
ASTANA. KAZINFORM – Astanada EXPO Goods Central Asia alǵashqy halyqaralyq forým-kórmesi ótip jatyr.
«EXPO» kórme ortalyǵynda uıymdastyrylǵan aıtýly sharany Saýda jáne ıntegratsııa mınıstri Arman Shaqqalıev ashty.
- Búgingi is-shara óńirlik jáne óńirden tys saýda-ekonomıkalyq baılanysty nyǵaıtýǵa baǵyttalǵan bastama. Kórme jyl saıynǵy bedeldi zamanaýı saýda jáne yntymaqtastyq alańyna aınalady dep senemiz. Forým men kórme sala kóshbasshylary, taýar jáne qyzmet mamandary, óndirýshiler men jetkizýshilerdiń basyn qosyp otyr, - dedi mınıstr forýmnyń ashylý saltanatynda.
Іs-sharaǵa Qazaqstan, Ózbekstan, Reseı, Belarýs, Qytaı, Pákistan, Iran, Latvııa jáne Estonııa syndy 9 elden 159 saýda kompanııasy qatysyp jatyr. Forýmǵa bıznes, memlekettik organdar, halyqaralyq uıymdar, bólshek saýda jelileri, elektrondyq kommertsııa, sondaı-aq HoReCa sektorynyń ókilderi kelip otyr.
Uıymdastyrýshylardyń aıtýynsha, EXPO Goods Central Asia – óńirlik kún tártibindegi mańyzdy oqıǵa, halyqaralyq deńgeıde qyzyǵýshylyq týdyrdy.
Kórmeden bólek, «Astana International Trade Forum» forýmy ótip jatyr. Oǵan Iran Islam Respýblıkasynyń Aýyl sharýashylyǵy mınıstri doktor Golamreza Nýrı, Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Han Chýnlın, sondaı-aq Pákistan Islam Respýblıkasynyń Qazaqstandaǵy Tótenshe jáne Ókiletti Elshisi Naýman Bashır Bhattı qatysty.
Kórmede 3000 sharshy metrdi alyp jatqan Tszıansý provıntsııasynyń pavılony, Jiangsu Soho Holding Group (QHR), Jiangsu Soho halyqaralyq saýda markasynyń ónimderi erekshe kózge túsedi.
Atalǵan saýda markalary ınvestıtsııa, mádenıet jáne densaýlyq saqtaý salalarynda jumys isteıdi. Saýda markalary 380-nen astam kompanııany biriktiredi, 20 000 qyzmetkeri bar, 160-tan astam elge eksport júrgizedi jáne 24 Qytaı–Eýropa temirjol marshrýtyn basqarady. Jyldyq aınalymy 100 mıllıard AQSh dollarynan asady.
EXPO Goods kórmesine álemdegi jetekshi elektrondyq kommertsııa jáne bólshek saýda kompanııalary belsene qatysyp jatyr. Qatysýshylar qatarynda Alibaba, Wildberries, Lamoda sııaqty kompanııalarmen qatar, ózge de transulttyq platformalar men jelilerdiń ókilderi bar.
Aıta keteıik, búginde elimizde elektrondyq kommertsııa naryǵy, ıaǵnı onlaın saýda ósip keledi.