EXPO aýmaǵynda jańa tehnologııalyq klaster qurylady
ASTANA. KAZINFORM – Qazaqstanda ınnovatsııalyq ınfraqurylymdy damytýdyń kelesi kezeńi retinde EXPO aýmaǵynda jańa tehnologııalyq klaster qurý josparlanyp otyr. Bul týraly Úkimet otyrysynda Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev málimdedi.
Mınıstrdiń aıtýynsha, Exponential Cluster dep atalatyn bul alań ǵylym, tehnologııalyq startaptar men ındýstrııany biriktiretin birtutas ekojúıege aınalady.
– Qazirgi ýaqytta klaster aıasynda Robotics, DroneTech, GameDev, Cybersecurity, MedTech, AgriTech jáne Industry 4.0 baǵyttary boıynsha mamandandyrylǵan ortalyqtar qalyptasyp jatyr, – dedi Jaslan Mádıev.
Onyń sózinshe, jańa klaster jyl saıyn 500-ge deıin startapty iske qosýǵa múmkindik beredi. Onyń ishinde 100-den astam hardware-joba júzege asady. Sonymen qatar elde ushqyshsyz tehnologııalardy damytýǵa erekshe nazar aýdarylyp otyr.
– Qazaqstanda halyqaralyq tehnologııalyq kompanııalardyń qatysýymen ushqyshsyz avtomobılder boıynsha pılottyq joba iske qosý josparlanyp otyr. Jobany 2026 jyldyń ekinshi toqsanynda júzege asyrý kózdelgen. Sonymen qatar dron arqyly jetkizý qyzmetin engizý jónindegi pılottyq joba da iske asyrylýda, – dedi mınıstr.
Mınıstrdiń aıtýynsha, bul bastamalar qalalyq mobıldilik pen logıstıkanyń jańa modelderin synaqtan ótkizýge múmkindik beredi.
Buǵan deıin Úkimet otyrysynda ınnovatsııalardy damytý máselesi talqylanatynyn jazǵan edik.
