EXPO 2025 Osaka kórmesindegi Qazaqstan pavılony mıllıonynshy meımanyn qarsy aldy
ASTANA. KAZINFORM — Qazaqstan pavılonynyń mıllıonynshy qonaǵy retinde Japonııanyń Hego prefektýrasyndaǵy Amagasakı qalasynan kelgen Kosýke Hasegava atandy.
Kórmeni tamashalaǵana mıllıonynshy qonaqqa «Kazakh Tourism» UK seriktestigimen birlesip, arnaıy syı-syıapat ta tabys etildi.
Qazaqstan men Japonııa arasynda ashylatyn tikeleı áýe baǵyty boıynsha bıznes-klass áýe bıleti, sondaı-aq Almaty — Astana — Almaty ishki reısine arnalǵan Airastana áýekompanııasynyń bıleti aldyn-ala syı retinde daıyndalǵan eken. @wyndhamgardenastana qonaqúıinde eki túneýge múmkindik aldy. Buǵan qosa @openturkistan tarapynan estelik syılyqtarǵa ıe bolmaq.
— Bul sát biz úshin erekshe sımvolǵa aınaldy. Qazaqstannyń mádenıeti, dástúrleri men jetistikterine degen qyzyǵýshylyq álemniń túkpir-túkpirindegi adamdardy biriktiredi. Bizben osy joldy birge bólisken árbir qonaqqa alǵys aıtamyz jáne birge dostyq, shabyt pen ashyqtyq rýhyn qalyptastyryp otyrǵanymyzǵa qýanyshtymyz, — dep jazdy uıymdastyrýshylar.
Al EXPO 2025 Osaka kórmesindegi Qazaqstan pavılonynyń mıllıonynshy qonaǵyn «QazExpoCongress» UK» AQ Basqarma tóraǵasy Dııas Azbergenov pen ulttyq sektsııanyń Bas komıssary Dáýlet Erkimbaev saltanatty túrde quttyqtady.
Mıllıonynshy qonaq — Kosýke Hasegava — Pavılonnyń kreatıvti tujyrymdamasy men ınnovatsııalyq tsıfrlyq kontenti ony erekshe tańǵaldyrǵanyn atap ótti. Bul sapar ony Qazaqstanǵa baryp, elimizdiń taýlarynyń, dalasynyń jáne tabıǵatynyń sulýlyǵyn óz kózimen kórýge yntalandyryp otyr.
Eske sala keteıik, buǵan deıin Japonııada Qazaqstannyń týy kóterilip, QR Saýda jáne ıntegratsııa mınıstri Arman Shaqqalıev bastaǵan qazaqstandyq delegatsııa EXPO 2025 Osaka dúnıejúzilik kórmesinde Qazaqstannyń Ulttyq kúni aıasyndaǵy is-sharalarǵa qatysqan edi.