EXPO 2025: Qazaqstan pavılonynyń 100 myńynshy qonaǵy Túrkistanǵa sertıfıkat jeńip aldy
ASTANA. KAZINFORM – EXPO 2025 Osaka dúnıejúzilik kórmesindegi Qazaqstannyń Ulttyq pavılony 100 myńynshy kelýshisin qarsy aldy. Ol – Nara qalasynyń 37 jasar turǵyny, japondyq Jeke qarjylyq bastamalar qaýymdastyǵynyń joba menedjeri Akıba Akıhıto.
− Bul men úshin kútpegen tosynsyı boldy Men pavılonnyń kontentine, atap aıtqanda Qazaq handyǵynyń qalyptasý tarıhyna jáne tarıh pen jańa tehnologııalardyń úılesimin kórip tańǵaldym. «ALEM» qurylǵysy tamyry tereńge jaıylǵan tarıhtaryńyzdy umytpaı, bolashaqqa kózqarastaryńyzdyń tamasha úlgisi boldy. Uıymdastyrýshylarǵa jyly lebizi úshin jáne tańǵajaıyp eldiń baı mádenıeti men tarıhy týraly kóbirek bilýge múmkindik alǵanym úshin raqmet. Qazaqstannyń mádenıetimen tanysý úshin Qazaqstanǵa baryp, Túrkistandy kórgim keledi, − dedi Akıba Akıhıto.
100 myńynshy qonaqty Qazaqstan Respýblıkasynyń Japonııadaǵy Tótenshe jáne ókiletti elshisi Erlan Baýdarbek-Qojataev quttyqtady. Ol Akıba Akıhıtoǵa «Karavansaray Turkistan» týrıstik keshenine eki adamǵa arnalǵan sertıfıkat pen estelik kádesyılardy tabystady.
Kelýshiler sanyn esepteýdi japondyq EXPO 2025 Osaka dúnıejúzilik kórmesin ótkizý qaýymdastyǵy arnaıy jabdyqtyń kómegimen júrgizedi. Qaýymdastyq mamandarynyń aıtýynsha, pavılon shaǵyn bolǵanymen, qazaqstandyq ekspozıtsııa kórme qonaqtaryna oılastyrylǵan kontentimen jáne joǵary tehnologııalyq eksponattarymen qyzyqty.
Qazaqstan pavılony tarıhqa, mádenıetke, ekonomıkalyq kórsetkishterge, ekojúıege, týrızmge, ınnovatsııaǵa basa den qoıylǵan 4 aımaqtan turady. Shańyraq sımvolyna negizdelgen tujyrymdamada 3D meppıngten bastap, ımmersıvti proektsııalyq shoýǵa deıin birneshe ınteraktıvti aımaq bar.
Sonymen birge, pavılon eldiń ınvestıtsııalyq jáne ekonomıkalyq áleýetin kórsetedi: munda negizgi salalar, tabıǵı resýrstar, týrıstik jáne ınnovatsııalyq áleýet, «jasyl» energetıka jáne turaqty damý salasyndaǵy jetistikter usynylǵan. Sondaı-aq aǵzalardy transplantatsııalaý jáne oqshaýlanǵan organdardy emdeý salasyndaǵy jetistik – «ALEM» (Astana Life Ex-situ Machine) ınnovatsııalyq qurylǵysy usynyldy. Qazaqstannyń jetekshi zertteýshileri men ınjenerleri ázirlegen «ALEM» donorlyq múshelerdi bir táýlikten de uzaq saqtaýǵa múmkindik beredi.
Eske sala ketsek, Japonııanyń Osaka qalasynda Dúnıejúzilik EXPO 2025 kórmesi bastaldy. Aýqymdy is-shara jumysyna 158 el men 9 halyqaralyq uıym atsalysyp jatyr. Kórme 13 sáýirde bastalyp, 2025 jyldyń 13 qazanyna deıin jalǵasady.
Aıta ketelik Japonııada Dúnıejúzilik EXPO 2025 kórmesi ótip jatyr.