Exit poll qorytyndysy partııalarǵa birqatar máseleni ashyp kórsetip berdi - sarapshy

NUR-SULTAN. QazAqparat – Saıasattanýshy Baýyrjan Serikbaev saılaýǵa baılanysty exit poll nátıjesine qatysty pikir bildirdi, dep habarlaıdy QazAqparat tilshisi.

Sarapshy oıyn birneshe bólimge bólip bildirgen. Facebook paraqshasynda jazǵandaı , qazirgi jaǵdaı tómendegideı:

1. Saılaýǵa bir aı qalǵanda rebrendıng jasap, «Biz kelsek bárin ózgertemiz» degen ýádege qoǵam sene qoımaıtynynyń kórsetkishi.

2. Saıası partııa degenimiz saılaýǵa bir aı qalǵanda emes, turaqty túrde halyqpen jumys isteýi kerektiginiń nátıjesi.

3. Parlamentke óte almaǵan partııalar aldaǵy 5 jyldan keıin bolatyn saılaýǵa dál qazir, búginnen, tipti osy mınýttan bastap daıyndalýy qajettiginiń dáleli.

4. Bıikte otyrǵan partııa 2016 jylmen salystyrǵanda (82%) 2021 jyly 10%-ke az daýys aldy. Bul da partııany oılandyrýy tıis.

5. Eń bastysy ár saılaýda eldegi bar 6 saıası partııalar bir saty kóterilip, saıası turǵyda óse túsýi kerek.

6. Saılaý ákelgen jańalyqtardyń biri praımerız bolsa, ekinshisi «Adal» atty partııa saıasat sahnasyna shyqty. Úshinshisi kommýnıster ózgerip, saıası turǵyda basqa ıdeologııalyq sıpat aldy.

7. Saılaý bastalǵaly beri «Rebrendıng ótkizý, bir aı qalǵanda belsený Qazaqstan sharttarynda qalaı jumys ister eken» dep júr edim. Nátıjesi tómendegideı. Resmı jaýap shyqqansha kúteıik. Biraq kóp dúnıe ózgermeıdi-aý.

8. Áleýmettik jelide emes, tikeleı halyqpen jumys isteý kerektiginiń bir kórinisi sekildi.

9. Menińshe bizde jańa saıası partııa qurylyp, jańa lep kelýi de kerek. Bul bizdi basqa deńgeıge kóteredi.

10. Parlamentke óte almaǵan partııalar aımaqtarda belsenip, aldaǵy ýaqytta elmen tyǵyz jumys isteıdi dep senemiz.

11. Shyny kerek byltyrǵy saılaý, bıylǵy jaǵdaılardy saraptap, osyndaı nátıje shyǵatynyn kóbi ishteı bildi de negizi. Sol boldy da. Úmit te boldy...

12. Óz basym Parlamentke az kandıdat usynǵanyn túsine almap edim. Azshylyqpen ýádeni oryndaý, al Parlamentte oryndaý múldem qıyn ǵoı... Tipti múmkindigi az dúnıe saıasatta.

«Degenmen resmı jaýap erteń shyǵyp qalar. Kúteıik...» - deıdi Baýyrjan Serikbaev.

Aıta keteıik, buǵan deıin «Qoǵamdyq pikir» zertteý ınstıtýty men «Demokratııa ınstıtýty» Exit poll qorytyndysy jarııalanǵan bolatyn.