EXANTE kompanııasy Qazaqstan qor naryǵynda jumys isteýge lıtsenzııa almaǵan - agenttik

NUR-SULTAN. QazAqparat - Qarjy naryǵyn retteý jáne damytý agenttigi EXANTE kompanııasyna qatysty túsinik berdi, dep habarlaıdy QazAqparat agenttiktiń baspasóz qyzmetine silteme jasap.

Qazirgi ýaqytta áleýmettik jelilerde ózin ınvestorlardyń álemdik saýda alańdaryna tikeleı kirýine múmkindik beretin ınvestıtsııalyq kompanııa jáne broker retinde kórsetetin EXANTE kompanııasynyń qyzmeti talqylanýda.

Qarjy naryǵyn retteý jáne damytý agenttiginiń túsindirýinshe, Qazaqstandaǵy baǵaly qaǵazdar naryǵynda kásibı qyzmetti qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organnyń tıisti lıtsenzııasyn alǵan uıymdar (lıtsenzıattar tizimi agenttik saıtynda kórsetilgen) ǵana júzege asyrýǵa quqyly.

«EXANTE kompanııasynyń elimizdiń baǵaly qaǵazdar naryǵynda kásibı qyzmetti júzege asyrýǵa berilgen lıtsenzııasy joq jáne ol Qazaqstan Respýblıkasynyń aýmaǵynda zańdy tulǵa retinde tirkelmegen. Bul rette sheteldik brokerler «Qazaqstannyń qor bırjasy» AQ (KASE) saýda alańynda KASE talaptaryna sáıkes kelgen jaǵdaıda KASE-niń qashyqtan músheligin alý jolymen mámile jasaýǵa quqyly. Alaıda EXANTE kompanııasy KASE múshesi emes. AHQO aýmaǵynda EXANTE kompanııasy Recognized Non-AIFC Member mártebesine ıe (bıznesi akkredıttelgen, alaıda AHQO múshesi bolyp tabylmaıdy). Bul mártebe brokerlerdiń AHQO aýmaǵynda bolmaı-aq AHQO-da qyzmetti júzege asyrýyna múmkindik beredi» delingen habarlamada.

Joǵaryda kórsetilgen kompanııa lıtsenzıat emes, onyń qyzmeti agenttiktiń tarapynan retteýge, baqylaýǵa jáne qadaǵalaýǵa jatpaıdy.

Tıisinshe, mundaı kompanııalarmen sharttyq qatynas ornata otyryp, ınvestor barlyq táýekelderdi derbes baǵalaýǵa jáne óz áreketi úshin jaýapkershilik arqalaýǵa tıis.