«Evrovıdenıe-2026»: Bolgarııa jeńiske jetti, Izraıl ekinshi oryn aldy
ASTANA. KAZINFORM – Bolgarııa «Evrovıdenıe-2026» fınalyndaǵy jeńisti toılap jatyr: baıqaý taǵdyryn kórermenderdiń daýys berýi sheshkennen keıin Izraıl ekinshi orynǵa syrǵydy.
Bolgarııa ánshi Daranyń «Bangaranga» atty keremet hıtimen «Evrovıdenıe» án baıqaýynyń 70-saıysynda jeńiske jetti.
Senbi kúni Aýstrııa astanasy Venada ótken úlken fınalda Dara 24 qarsylasyn basyp ozdy. Ánniń juqpaly yrǵaǵy men usaq-túıegine deıin pysyqtalǵan horeografııasy tele kórermender men ulttyq qazylar alqasyna da qatty áser etti.
Bul – Bolgarııanyń «Evrovıdenıe» tarıhyndaǵy alǵashqy jeńisi. Óz elinde Dara burynnan tanymal jáne «Golos. Bolgarııa» shoýynda tálimger retinde óner kórsetip júr, alaıda ol basty favorıtterdiń qatarynda sanalmaǵan edi.
Kórermender daýys berýiniń qorytyndysy jarııalanǵanǵa deıin jeńisti Izraıl ókili Noam Bettan ıelenetindeı kóringen.
Sebebi Bettannyń ónerine kórermender erekshe shapalaq urǵan edi. Degenmen ol ıvrıt, frantsýz jáne aǵylshyn tilderinde «Michelle» rok-balladasyn oryndaǵan kezde zaldan jekelegen narazylyq daýystary da estildi.
Rýmynııa ókili Aleksandra Kepyteneský arandatýshylyq ataýǵa ıe «Choke Me» rok-kompozıtsııasymen úshinshi oryndy ıelendi. Aýstralııalyq juldyz Delta Gýdrem minsiz qurylǵan ortasha temptegi «Eclipse» balladasymen tórtinshi oryn aldy, al ıtalııalyq ánshi Sal Da Vınchı «Per Sempre Sì» ánimen úzdik bestikti túıindedi.
Býkmekerler basty favorıtterdiń biri sanaǵan fındik dýet – pop-oryndaýshy Pete Parkkonen men klassıkalyq skrıpkashy Lında Lampenıýs aqyrynda tek altynshy orynmen shekteldi.
«Evrovıdenıe» baıqaýynyń tarıhshysy Dın Výletıch baıqaý jıi tosynsyı syılaıtynyn atap ótti.
– «Evrovıdenıe» eshqashan naǵyz sýperjuldyzdardyń jarysy bolǵan emes. Bul kóbirek aýtsaıderler baıqaýy, – deıdi Výletıch. – Adamdarǵa sahnadan aýtsaıderdi kórý unaıdy. Olarǵa endi ǵana juldyzǵa aınalyp kele jatqan ártisti nemese shaǵyn ári kedeıleý elden shyqqan oryndaýshyny baqylaý qyzyq.
Eske sala ketsek, buǵan deıin «Evrovıdenıe» fınalyna qandaı elder joldama alǵanyn jazdyq.
