«Evrovıdenıe-2017» baıqaýynyń alǵashqy fınalısteri anyqtaldy
ASTANA. QazAqparat - Kıevte «Evrovıdenıe-2017» baıqaýynyń alǵashqa jartylaıfınaldyq básekeleri aıaqtaldy.
Aqtyq synǵa 18 qatysýshy-memlekettiń tek 10-ynyń ókilderi ótti. Olar Moldova, Ázerbaıjan, Gretsııa, Shvetsııa, Portýgalııa, Polsha, Armenııa, Avstralııa, Kıpr jáne Belgııa elderiniń ánshileri, dep habarlanǵan baıqaýdyń resmı saıtynda.
Fınalıster eki kezeńmen anyqtaldy. Ulttyq qazylar alqasy óz baǵalaryn bas daıyndyq kezinde qoıǵan bolsa, kórermender daýystaryn shoý telearnadan kórsetilip jatqan sátte berdi.
Ekinshi jartylaı fınal - 11 mamyr kúni ótedi. Baıqaýdyń aqtyq synyna ótý úshin Makedonııa, Malta, Nıderlandy, Serbııa, Danııa, Rýmynııa, Vengrııa, Avstrııa, Irlandııa, Shveıtsarııa, Estonııa, Izraıl, Bolgarııa, San-Marıno, Lıtva, Horvatııa, Norvegııa jáne Belarýs elderiniń qatysýshylary baq talastyratyn bolady.
Eske salaıyq, Bolgarııa namysyn qorǵaıtyn ánshi Krıstıan Kostov «QazAqparatqa» suhbat bergen bolatyn . Qazaqqa jıen bolyp keletin jas oryndaýshy qazaqtyń halyq ánderine, onyń baı folkloryna tańdana qaraıtynyn aıtty. Sondaı-aq Qazaqstanǵa gastroldik saparmen kelip, besik jyrlaryn djaz stılinde oryndaýdy oılap júrgenin jetkizdi. "Sebebi bul ánderdiń áýeninde qazaq halqynyń myńjyldyq tarıhy jatyr. Al jańasha baǵytta bul áýender mıllıondaǵan jandardyń júregine jol tabady dep senemin", - dedi ol.
«Evrovıdenıe-2017» 62-inshi Halyqaralyq án baıqaýynyń ashylýy 7 mamyr kúni Kıevtegi "Parkovyı" kórme ortalyǵynda ótti.
Baıqaýdyń fınaly 13 mamyrǵa belgilengen.
