«Evrovıdenıe-2015» baıqaýyna 39 eldiń ónerpazdary qatysady
ASTANA. QazAqparat - "Evrovıdenıe-2015" halyqaralyq án baıqaýyna 39 el qatysady, dep habarlanǵan baıqaýdyń resmı saıtynda.
Bul ótken jylǵydan eki elge artyq. Birqatar elderdegi kúrdeli ekonomıkalyq jaǵdaılarǵa baılanysty qatysýshylar sany az bolýy múmkin degen boljam aıtylýda. Alaıda 60-shy márte uıymdastyrylǵaly otyrǵan baıqaýǵa 39 eldiń ónerpazdary qatysady. Shyǵarmashylyq baıqaýǵa Kıpr, Chehııa jáne Serbııa qaıta qatysatyn boldy.
Qatysýshy elder sany taq bolǵandyqtan, jartylaı fınalda ártisterdiń túrli sany baq synasady. 19 mamyrda ótetin "Evrovıdenıe-2015" baıqaýynyń birinshi jartylaı fınalynda 16 eldiń óner ókilderi, al 21 mamyrdaǵy ekinshi jartylaı fınalynda 17 eldiń ánshileri jurtshylyq aldyna shyǵady.
Kelesi jyldyń 26 qańtarynda qaı elderdiń birinshi jartylaı fınalda, qaı elderdiń ekinshi jartylaı fınalda óner kórsetetini belgili bolady. Ár jartylaı fınalda úzdik atanǵan on eldiń oryndaýshylary aqtyq synǵa joldama alady. Sońǵy márede olarǵa Frantsııa, Germanııa, Italııa, Ispanııa jáne Ulybrıtanııa, sonymen qatar qonaqtardy qabyldap jatqan Avstrııa elderiniń ókilderi qosylady.
