Evropol «Petya»-dan zardap shekkenderge keńesterin berdi
BRıÝSSELЬ. QazAqparat - Álem boıynsha taraǵan kompıýterlik Petya vırýsynyń WannaCry vırýsymen uqsastyqtary bar, biraq anaǵurlym jetildirilgen. Evropol eýropalyq quqyq qorǵaý agenttigi zııandy baǵdarlamalyq jasaqtama týraly osyndaı pikir bildirdi, dep habarlaıdy «QazAqparat» HAA tilshisi.
«Bul jahandyq yqpaly bar, aqsha bopsalaý maqsatyndaǵy taǵy bir kúrdeli shabýyl. WannaCry shabýylymen naqty uqsastyqtary bar, biraq anaǵurlym jetildirilgen shabýyl belgileri baıqalady», - dedi Evropol basshysy Rob Ýeınraıt.
Vırýs týraly alǵashqy habardan soń Evropol shuǵyl úılestirý komıssııasyn qurdy jáne qazirgi ýaqytta vırýstyń taralýyn baqylap otyr.
«Shabýyldyń yqpalyn baǵamdap, is-árekettiúılestirip, kúshimizdi biriktirý úshin vırýs juqtyrǵan elderdiń quqyq qorǵaý organdarymen jáne sala boıynsha negizgi seriktestermen tyǵyz baılanystamyz», -dep atap ótti Evropoldan.
Sonymen birge, mekeme ázirge qansha adamnyń zardap shekkenin anyq aıta almaıtyndaryn jetkizdi jáne vırýsty juqtyrǵan jaǵdaıda hakerlerge eshqashan aqsha tólemeýge keńes berdi.
«Sizder qylmyskerlerdi qarjylandyryp qana qoımaı, óz faıldaryńyzǵa qol jetkize almaı qalasyzdar. Bul ásirese Petya vırýsy jaǵdaıynda óte ózekti, sebebi aqsha talap etýdi basqarýǵa qoldanylatyn elektrondy poshtanyń esep jazbasy buǵattaldy», - dep eskertti Evropoldan.
Sondaı-aq, kıbershabýyl bolǵan jaǵdaıda jergilikti polıtsııaǵa habarlasý kerek jáne qaskóılerden kelgen elektrondy hattyń kóshirmesin saqtaý qajet.
Odan bólek, vırýs kirgen qurylǵyny Internetten ajyratý qajet.
«Eger vırýs kirgen qurylǵy jeliniń bir bólshegi bolsa, vırýstyń ózge kompıýterlerge taralýynyń aldyn alý úshin, ony dereý oqshaýlaý qajet», - deıdi quqyq qorǵaýshylar.
«Kasperskıı zerthanasynyń» derekterine sáıkes,shabýylǵa ushyraǵan qoldanýshylar sany 2 myńǵa jetti. Eń kóp shabýyl oqıǵasy Reseı men Ýkraınada tirkeldi, sondaı-aq vırýs juqtyrý oqıǵasy Polsha, Italııa Ulybrıtanııa, Germanııa, Frantsııa jáne AQSh-ta baıqalǵan.
