«Evronıýstyń qazaqsha nusqasyn jáne túrki tildes elder telearnasyn ashý kerek»
ASTANA. QazAqparat - Búgin L.N.Gýmılev atyndaǵy Eýrazııa ulttyq ýnıversıtetinde Parlament depýtattary men BAQ ókilderi, ǵalymdar jáne qoǵam qaıratkerleriniń qatysýymen ótken dóńgelek ústelde Evronıýstyń qazaqsha nusqasyn jáne túrki tildes elder telearnasyn ashý kerek degen bastama kóterildi.
Otyrysta EUÝ rektory Erlan Sydyqovtyń qoǵam jáne BAQ ókilderimen baılanys jónindegi keńesshisi Erkin Baıǵabyluly televızııa máseleleri týraly baıandama jasady.
«Qazaqstannyń qoǵam qaıratkerleri ortasynda jańa telearnalar ashýǵa qatysty usynystar jıi aıtylyp júr. Birinshisi, túrki tildes elderdiń ortaq telearnasyn qurý bastamasy. Ekinshisi, Evronıýstyń qazaqsha nusqasyn ashý máselesi.
Ekeýi de zaman talabyna saı kóterilgen másele. Mundaı arnalar ashylsa, jýrnalıstik qyzmettiń sapasy da artary sózsiz. Jetekshi shetel ujymdarymen tájirıbe almasý da keńeıedi. Baılanys jáne aqparat agenttigi bul usynystarǵa qatysty arnaıy saraptama jasaýy tıis», - dedi ol.
