«Evro-5» retinde ótkizilgen «Evro-2»: Astanada 20 júk kóligin zańsyz kirgizgen úsh adam sottaldy
ASTANA. KAZINFORM — Astanada Qytaıdan 20 FAW júk avtokóligin zańsyz ákelý shemasyna qatysqan úsh adamǵa qatysty aıyptaý úkimi shyqty.
Tehnıkanyń is júzinde «Evro-2» ekologııalyq klasyna saı ekeni, biraq kedendik rásimdeý kezinde jalǵan málimetteri bar qujattardy paıdalaný arqyly «Evro-5» talaptaryna sáıkes retinde usynylǵany anyqtaldy.
2023 jyldyń aqpan-mamyr aralyǵynda «Nur Joly» jáne «Baqty» keden beketteri arqyly Qazaqstanǵa 20 júk kóligi zańsyz kirgizilgen. Olardyń kedendik quny 285 mln teńge.
Keıinnen bul tehnıka kommertsııalyq qurylymdar arqyly ótkizilip, memlekettik satyp alý aıasynda «QAJservıs» JShS-ne jalpy somasy 605 mln teńgege jetkizilgen.
Sot úsh aıyptalýshyny aldyn ala kelisip jasaǵan asa iri mólsherdegi ekonomıkalyq kontrabanda úshin kináli dep tapty.
Budan bólek, sottalǵandardan memleket kirisine kontrabanda zatynyń quny — 285 mln teńge ortaqtasyp óndirildi.
Úkim zańdy kúshine engen joq.
Aıta ketelik Shymkentte 7 myńnan astam júk kóligi tekserilip, 300 mln teńge aıyppul salynǵan edi.
