Evreıler qazaqtardy aýyl sharýashylyǵyna úıretpekshi
ASTANA. QazAqparat - Izraıl memleketi Ońtústik Qazaqstanda arnaıy aýyl sharýashylyǵy ýchaskesin ashpaqshy. Onda evreılerdiń ozyq texnologııalary negizinde aýal sharýashyǵy ónimderin ósirý tájirıbesi kórsetiledi, dep xabarlaıdy QazAqparat tilshisi.
Izraıldiń Qazaqstandaǵy Tótenshe jáne Ókiletti elshisi Mıxael Brodskııdiń aıtýynsha, Izraıl premer-mınıstri Bınıamın Netanıaxýdyń Qazaqstanǵa jasaıtyn resmı sapary aıasynda aýyl sharýashylyǵy salasynda ózara yntymaqtastyq týraly kelisimge qol qoıylady.
«Atalǵan qujat Ońtústik Qazaqstanda aýyl sharýashylyǵy klasterin qalyptastyrýǵa arnalyp otyr. Biz osy máseleni oblys ákimdigimen de talqylaǵan bolatynbyz. Negizgi maqsat - aýyl sharýashylyǵyna arnalǵan demostratsııalyq ýchaskeni ashý. Onda osy saladaǵy Izraıldiń texnologııalary ornatylady. Sonyń negizinde aýyl sharýashylyǵy ónimderi ósiriledi. Artynan ony ishki naryqqa, ıa bolmasa, syrtqa sata ma, ony áli de talqylaıtyn bolamyz», - dedi M.Brodskıı Astanada ótken baspasóz máslıxatynda.
Aıta keteıik, aldaǵy sársenbi, jeltoqsannyń 14-i kúni Izraıldiń premer-mınıstri Bınıamın Netanıaxý Qazaqstanǵa resmı saparmen keledi. Premer-mınıstrmen birge ishinde buqaralyq aqparat quraldary, sondaı-aq 70-ke jýyq bıznesmender bar úlken delegatsııa bolady. Olar Qazaqstan-Izraıl bıznes-forýmyna qatysady. B.Netanıaxýnyń ózi aldymen Aqordaǵa baryp, Memleket basshysy Nursultan Nazarbaevpen kezdesedi. Sosyn Parlament Senatynyń tóraǵasymen kezdesedi degen jospar bar. Bul sońǵy 25 jylda Izraıl premer-mınıstriniń Ortalyq Azııaǵa jasaıtyn alǵashqy sapary bolmaq. Osy sapar aıasynda Izraıl men Qazaqstannyń arasynda tikeleı áýe reısi ashylýy ábden múmkin.
