Evreıler qaýymdastyǵy Qazaqstanǵa quttyqtaý hat joldady
«Asa qurmetti Prezıdent myrza! Eýroazııalyq evreıler kongresiniń kóshbasshylarynyń jáne jeke ózimniń atymnan sizdi jáne Qazaqstan Respýblıkasynyń barsha halqyn Izraıl memleketimen keń aýqymdy dıplomatııalyq qatynastardyń ornaǵanyna 30 jyl tolýymen shyn júrekten quttyqtaımyn. Osydan otyz jyl buryn bizdiń memleketterimiz ben halyqtarymyz úshin jańa taraý bastaldy: tolyqqandy senimdi qarym-qatynas pen seriktestik ornatýǵa jol ashyldy. Sizge, sizdiń ızraıldik áriptesterińizge jáne qos memlekettiń halyqtaryna dostyq baılanystardyń damýyn, ózara órkendeý men ıgilik tileımin!», - dep jazylǵan quttyqtaý hatta.
Kongress prezıdenti evreı jáne qazaq halqynyń myńjyldyqtarǵa jalǵasqan tyǵyz baılanysy qazirgi qarym-qatynastar úshin myqty baza bolǵanyn atap ótti. Onyń qaınar kózi Orta ǵasyrlarǵa, Uly Jibek joly zamanyna aparar edi.
«Ekinshi dúnıejúzilik soǵys kezinde de zulymdyqtan qashqan evreılerdi Qazaqstan jyly júzben qabyldady. Biz muny umytpaımyz jáne Qazaqstan halqyna úlken alǵys bildiremiz. Júzdegen jyldar boıy evreıler qazirgi Qazaqstan aýmaǵynda ózderin jaıly sezinip, ózara qabyldaý men qoldaý atmosferasynda damyp keledi. Óz kezeginde, Eýroazııalyq evreıler kongresiniń kóshbasshylary shyn júrekten qoǵamdyq dıplomatııa salasynda jumys isteýge nıetti. Eki el arasyndaǵy dıplomatııalyq, ekonomıkalyq, ǵylymı jáne mádenı baılanystardy nyǵaıtýǵa jáne damytýǵa belsene atsalysqandardyń barlyǵyna tabys tileımin», - dedi M. Mırılashvılı.
Sonymen birge, Qazaqstan Respýblıkasyndaǵy evreı qaýymy 30 jyl boıy úlken jetistikterge jetti, eldegi evreıler qaýymdastyǵyn jandandyrdy.
«Jaqynda ǵana óziniń 30 jyldyǵyn atap ótken Eýroazııalyq evreıler kongresi Qazaqstandy árdaıym óńirlik qyzmetimizdiń mańyzdy núktesi retinde qarastyrdy. Ondaǵan jyldar boıy kongress Qazaqstandaǵy evreı qaýymdastyǵynyń baǵdarlamalaryn jáne óńirdiń kóptegen áleýmettik jáne bilim berý jobalaryn qoldap keledi. Biz evreı qaýymdastyǵynyń damyǵanyna, onyń órkendeýine yqpal etkenimizge qýanyshtymyz jáne respýblıka basshylyǵyna jáne ózińizge alǵys aıtamyz.Sizdi jáne búkil Qazaqstan halqyn Izraıl memleketimen dıplomatııalyq qatynastardyń ornaǵanyna 30 jyl tolýymen taǵy da quttyqtaýǵa ruqsat etińiz», - deıdi Mıhaıl Mırılashvılı.
