Evgenıı Koshkın konkımen júgirýden álem kýbogy kezeńinde kúmis júlde aldy

ASTANA. KAZINFORM - Konkımen júgirýden Qazaqstan quramasynyń ókili Evgenıı Koshkın Solt-Leık-Sıtıde (AQSh) ótken Álem kýbogy kezeńinde ekinshi oryn aldy, dep habarlaıdy olympic.kz.

Otandasymyz 500 metr qashyqtyqta kúmis medalǵa ıe boldy. Koshkın jarysty 33.67 nátıjesimen aıaqtap, jeke kórsetkishin jańartty.

Birinshi oryndy nıderlandtyq Iennıng De Bý (33.63) jeńip aldy. Ońtústikkoreıalyq ıÝn Ho Kım 33.78 kórsetkishimen úshinshi boldy.

Osyǵan deıin mánerlep syrǵanaýshy Mıhaıl Shaıdorovtyń AQSh-ta ótken Gran-prı kezeńinde kúmis medal jeńip alǵany týraly jazdyq.

Qysqa baǵdarlamada sportshymyz úshinshi nátıje kórsetti. Al erkin baǵdarlamada Shaıdorov 161,42 upaımen kósh bastady.

Eki baǵdarlamanyń qorytyndysy boıynsha ol 251,09 upaı jınap, jalpy esepte ekinshi oryn aldy. Frantsııa ókili Kevın Aımoz jarys jeńimpazy atandy. (253,53 upaı). Qola medaldi japonııalyq Kazýkı Tomono jeńip aldy (245,57 upaı).

 /