Evgenıı Korolev «Barys» komandasy bas bapkeriniń mindetin ýaqytsha atqarady

ASTANA. KAZINFORM - Bul jóninde komandanyń baspasóz qyzmeti málim etti.

Mundaı sheshim elordalyq klýbtyń Qurlyqtyq hokkeı lıgasynyń ótken maýsymynda tirkelgen tómen sporttyq kórsetkishine baılanysty qabyldanyp otyr. Osyndaı sebeppen «Barys» basshylyǵy negizgi komandanyń bapkerler quramynda ózgerister engizý týraly sheshim qabyldady.

Aıta ketsek, qazirge deıin «Barys» komandasy bas bapkeriniń mindetin Ǵalym Mámbetálıev atqaryp keldi. Ol bul qyzmetke ótken jyldyń qazan aıynda kelgen edi.

Bıyl «Barys» Qurlyqtyq hokkeı lıgasynda sátsiz oıyn kórsetti. Shyǵys konferentsııasynda 12 oryn alyp, 68 oıynnan keıin nebári 35 upaı jınady.

Qazir elordalyq klýb jańa maýsymǵa daıyndyǵyn bastap ketti. Oqý-jattyǵý jıynynyń negizgi bóligi Astana qalasynda ótedi. Aldymen medıtsınalyq komıssııa tekserýinen keıin ekijaqty kelisimshartqa qol qoıǵan hokkeıshiler 15 shildeden bastap daıyndyqqa kiristi. Al 1 tamyzdan bastap birjaqty kelisimshartqa qol qoıǵan hokkeıshiler olardyń qataryna qosylady.

Elordalyq komanda 26-29 tamyz aralyǵynda Reseıdiń Magnıtogorsk qalasyndaǵy halyqaralyq «Ivan Romazan memorıaly» týrnırine qatysady.

Qazaqstandyq klýb jańa maýsymda alǵashqy úsh oıyndy elordada ótkizedi. Aldymen 7 qyrkúıekte Reseıdiń «Traktor» (Chelıabınsk) komandasymen kezdesse, odan keıin 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.