Everestiń shyǵys betkeıinde boranǵa baılanysty 1 myń týrıst turyp qaldy
ASTANA. KAZINFORM — Shamamen 1 myń týrıst Everestiń shyǵys betkeıinde qatty boran saldarynan shatyrlarda panalaýǵa májbúr boldy. Bul týraly «Sansıan dýshıbao» basylymy habarlady, dep jazdy TASS agenttigi.
4 qazan kúni taýdyń shyǵys betkeıinde sońǵy jyldardaǵy eń kúshti borannan keıin negizgi marshrýttar tolyqtaı jabylyp, kóriný kúrt 1 metrge deıin tómendegen. Joǵaryǵa shyǵatyn týrıster muzdaq joldarmen ári qaraı júre almaı, óz shatyrlaryna panalaýǵa májbúr bolǵan. Keıbir týrıster tómen qaraı túsýin jalǵastyrsa da, kópshiligi qutqarýshylardyń kómegine muqtaj, dep jazady basylym.
«Tszımý sınven» aqparattyq portalynyń málimeti boıynsha, týrıster 4 900 metr bıiktiktegi lagerde turyp qaldy.
Qytaıdyń Tıbet avtonomııalyq aýdanynyń Shıgadze qalasy bıligi qutqarýshylar toptaryn týrısterge kómek kórsetý úshin jibergenin habarlady.
Everest (Djomolýngma) Mahalangýr-Hımal gımalaı jotasyna kiredi, taý Nepal men Qytaıdyń Tıbet avtonomııalyq aımaǵynyń shekarasynda ornalasqan. 2020 jyldyń jeltoqsanynda Qytaı men Nepal birlesken ekspedıtsııalardan keıin Everestiń jańa bıiktigin jarııalady: ol 8 848,86 metrdi quraıdy, bul burynǵydan 86 sm joǵary.
Eske sala keteıik, Qyrǵyzstannyń alpınızm jáne sporttyq quzǵa órmeleý federatsııasynyń prezıdenti Edýard Kýbatov reseılik alpınıst Natalıa Nagovıtsyna qaza tapqanyn rastaǵan bolatyn.