Everest shyńyn baǵyndyrǵan qazaq qyzy endi qaı taýǵa tý tigedi
ASTANA. KAZINFORM – Everest shyńyn (8 848 m) baǵyndyrǵan ekinshi qazaq áıeli Jámıla Bashırova aldaǵy josparlarymen bólisti.
Ol ataqty shyńǵa shyǵý ońaıǵa soqpaǵanyn aıtady. Sondaı-aq onyń eń birinshi áreketi aýa raıyna baılanysty sátsiz aıaqtalǵan. Dese de, maqsatyna jetý úshin eshteńeden qaımyqpaǵan qaısar arý Nepalda 1 aptadan astam ýaqyt kútip, ekinshi múmkindiginde Everest shyńyn baǵyndyra aldy.
«Alǵashqy saparymyzda orta joldan qaıtqanymyz úshin qatty jyladym. Ár saparǵa qomaqty qarajat qajet ekeni belgili. Everest shyńyn baǵyndyrýǵa degen nıetimdi baıqaǵan áriptesim demeýshilik kórsetýge daıyn ekenin jetkizdi. Eki saparǵa shamamen 100 myń dollar qarjy jumsaldy. Endigi maqsatym – Madablan shyńyn baǵyndyrý», - deıdi ol.
Jámıla mansabynda Everestten bólek, Eýropanyń eń bıik núktesi Elbrýsqa (5 642 metr), Ońtústik Amerıkanyń eń bıik núktesi Akonkagýaǵa (6 962 metr), Lenın shyńyna (7 134 metr) shyqqan.
44 jastaǵy Semeı óńiriniń týmasy tamaqtaný óndirisi boıynsha ınjener-tehnolog mamandyǵyn ıgergen. Onyń aıtýynsha, sońǵy tórt jylda tapqan tabysyn shyńǵa shyǵý úshin jınapty.
«Men osy qadamǵa barǵanyma bir sát te ókingen emespin. Ózimniń rýhanı áserim úshin qomaqty qarjyny jumsaı alǵanyma keýdemdi ǵajaıyp sezim kernedi. Bir bólmeli páterde turamyn, brıllıant nemese brend áshekeılerim joq. Astymda kóligim joq. Keıingi tórt jylda tapqan qarajatymdy shyńdardy baǵyndyrýǵa jumsadym. Bıik shyńǵa jetkende siz kez kelgen nársege qabiletti ekenińizdi jáne eshqandaı kedergiler joq ekenin túsinesiz. Siz áıel bolsańyz da, kez kelgen qıyndyqty jeńýge kúsh-qýat bar - bala týý, aǵash otyrǵyzý nemese Everestti baǵyndyrý. Men qanshalyqty kúshti jáne qabiletti ekenimizdi kórsetý arqyly barlyq qyzdar men áıelderdi shabyttandyrǵym keledi», - deıdi Jámıla.
Eske salsaq, buǵan deıin 44 jastaǵy otandasymyz Jámıla Bashırovanyń Everest shyńyn baǵyndyrǵanyn jazǵan edik.
