Evander Holıfıld Qyrǵyzstanda boks akademııasyn ashýdy josparlap otyr
BІShKEK. KAZINFORM — Álemdik boks ańyzy Evander Holıfıld Qyrǵyzstanǵa barady, dep habarlaıdy Kazinform agenttiginiń Bishkektegi menshikti tilshisi.
Halyqaralyq kásibı boks keshin uıymdastyrý komıtetiniń málimetinshe, eki salmaq dárejesinde burynǵy absolıýtti álem chempıony, tanymal amerıkalyq boksshy Evander Holıfıld Qyrǵyzstanda óziniń boks akademııasyn ashýǵa nıetti ekenin bildirdi.
Akademııa jas sportshylardy jattyqtyrady, jattyqtyrý mektebin damytady jáne álemdik deńgeıdegi jetekshi mamandarmen tájirıbe almasady dep kútilip otyr. Jobanyń egjeı-tegjeıi, akademııanyń yqtımal ornalasýy jáne yntymaqtastyqtyń naqty formaty onyń elge sapary kezinde talqylanady dep josparlanyp otyr.
Budan basqa, Ystyqkólde E. Holıfıldtiń mansabyna arnalǵan jańa derekti fılmniń epızodtary túsiriledi.
Burynǵy absolıýtti álem chempıony 3 shildede el astanasynda ótetin iri halyqaralyq boks týrnırine qurmetti qonaq retinde ushyp barady.
Boks keshine Qazaqstan, Qyrǵyzstan, Ózbekstan, Tájikstan, Reseı, Taıland jáne Kýba ókilderi qatysady. Kórermender segiz kásibı, onyń ishinde eki tıtýldyq jekpe-jekti tamashalaıdy.
Qurmetti qonaqtar qatarynda sondaı-aq Olımpıada oıyndarynyń qola júldegeri, WBA jáne WBO halyqaralyq tıtýldarynyń ıegeri, qazaqstandyq Qanat Islam, ózbekstandyq Olımpıada chempıony Muhammedqadyr Abdýllaev jáne Olımpıada chempıony jáne burynǵy WBA álem chempıony Aleksandr Povetkın bolatyny kútilip otyr.
Osyǵan deıin Qyrǵyzstan VI Dúnıejúzilik kóshpendiler oıyndarynyń beınerolıgin jarııalady.
