Evamen jekpe-jek ońaıǵa túspeıin dep tur - Fırýza Sháripova
Jekpe-jek ústimizdegi jyldyń 22 jeltoqsanynda Sankt-Peterbýrgte ótedi dep josparlanǵan. Aıtýly boks keshin «Habar» telearnasy Astana ýaqytymen 23:00-de tikeleı efırde kórsetedi.
«Jekpe-jekke negizgi daıyndyq ótti. Qazir ýaqytsha úzilis. Ózimdi jaqsy sezinip júrmin. Osy ýaqyt aralyǵynda qarsylasymnyń myqty jáne álsiz tustaryn izdeýmen boldym. Biraq Evamen jekpe-jek ońaıǵa túspeıin dep tur, óıtkeni ol - óte tájirıbeli boksshy. Sondyqtan bul meniń kásibı bokstaǵy eń aýyr jekpe-jegimniń biri bolǵaly tur. Degenmen, jattyǵý tıisti deńgeıde ótip jatyr. Boks alańyna shyǵýǵa daıynmyn», - dedi Fırýza Sháripova OKQ-de ótken baspasóz máslıhatynda.
Sonymen qatar, boksshy aldaǵy maqsaty - kásibı boksta absolıýtti chempıon ataný ekenin tilge tıek etti.
Boksshylar sharshy alańǵa ekinshi jartylaı orta salmaqtaǵy eki belbeý úshin shyǵady. WBC tujyrymy boıynsha Valstremge tıesili belbeý men Fırýza Sháripovanyń IBO tujyrymy boıynsha belbeýi jeńimpazǵa buıyrady.
«Jekpe-jek kúni belgili bolǵannan bastap daıyndyq jumystaryna kirisip kettik. Sondaı-aq, qarsylasymyzdyń qyr-syryn tanyp bilýdemiz. Promoýter retinde daıyndyq barysynda eshqandaı kedergi bolǵan joq jáne jattyǵýdy óz deńgeıinde jalǵastyramyz. Degenmen, qarajat jaǵynan problema baryn jasyrmaımyz», - deıdi boksshynyń menedjeri Sergeı Zavıleıskıı.
Boksshynyń menedjeri áserli boks keshin uıymdastyrý kem degende jarty mıllıon dollar turatynyn aıtyp, Fırýzanyń sporttaǵy jekpe-jekterin ótkizýde únemi qoldaý bildiretin QR Mádenıet jáne sport mınıstrligine alǵysyn bildirdi.
Eske salsaq, ústimizdegi jyldyń 8 qyrkúıeginde Fırýza Sháripova reseılik ıÝlııa Kýtsenkony jeńip, óz ataqtarynyń birin qorǵap qalǵan bolatyn.
Odan bólek, boksshy «Taqtar oıyny» serıalyna túskisi keletinin aıtyp, «NVO telearnasy serıaldarǵa basymdyq berýdi jón sanapty - onda biz de baǵymyzdy synap kóreıik» degen bolatyn.