Evakýatsııalyq ortalyqtaǵy balalar saýyqtyrý ortalyqtaryna jiberile bastady – Dınara Zákıeva

ASTANA. KAZINFORM – Evakýatsııalyq ortalyqtaǵy balalar saýyqtyrý ortalyqtaryna jiberile bastady. Bul týraly Bala quqyqtary jónindegi ýákil Dınara Zákıeva aıtty.

«Sý tasqyny bastalǵaly beri 99 869 adam qutqaryldy, onyń 37 myńǵa jýyǵy – balalar. Qazir Aqtóbe, Batys Qazaqstan, Atyraý, Mańǵystaý, Qostanaı, Soltústik Qazaqstan oblystaryndaǵy evakýatsııalyq pýnktterde 3194 bala bar. Jalpy, 54 evakýatsııalyq pýnkt mektepterde, jataqhanalarda jáne ınternattarda ornalasqan. Balalarǵa tolyqqandy tamaqtaný jáne oqý úshin barlyq qajetti jaǵdaı jasaldy, qajet bolǵan jaǵdaıda kıimmen, aıaq kıimmen, kantselıarııamen jáne tehnıkalyq quraldarmen qamtamasyz etilýde. Evakýatsııa pýnktterinde 400-den astam mektep psıhology sý tasqynynan zardap shekken balalar men azamattarǵa psıhologııalyq kómek kórsetip jatyr», - dedi ol Ortalyq kommýnıkatsııalar qyzmetindegi brıfıngide.

Onyń atap ótýinshe, Úkimet evakýatsııalyq ortalyqtarda ornalasqan balalarmen jumys isteý algorıtmin ázirledi.

«Osy jaǵdaıda bizdiń birinshi mindetimiz - sý tasqyny jáne qalpyna keltirý jumystary aıaqtalǵanǵa deıin balalardy oqýmen, qolaıly jaǵdaılarmen jáne jazǵy demalyspen qamtamasyz etý. Qazir evakýatsııalyq ortalyqtarda turyp jatqan balalar oqýyn tynysh jalǵastyra alýy úshin bastaýysh synyp oqýshylary 11 balalar saýyqtyrý lagerine jiberile bastady. 5-8 synyp oqýshylary «Daryn», Bilim ınnovatsııa lıtseıleri jáne Nazarbaev Zııatkerlik mektepteriniń ınternattaryna ornalastyrylady. Al 9-11 synyp oqýshylary kolledjder men joǵary oqý oryndarynda ornalasady», - dedi Dınara Zákıeva.

Eske sala keteıik, buǵan deıin Atyraýda Jaıyq jaǵasyndaǵy kameralar onlaın translıatsııaǵa qosylǵanyn jazǵan edik.