Evakýatsııalanǵan qazaqstandyqtar Izraıldegi jaǵdaı týraly aıtty

Evakýatsııalanǵan qazaqstandyqtar elge ushyp kelgennen keıin Izraıldegi jaǵdaı týraly aıtty, dep habarlaıdy Kazinform.

Astana qalasynyń turǵyny Aıgúl Ábdikerova nemeresimen Izraılge qydyryp barǵan. Ol jerde bir aı bolǵan.

«Osydan bir aı buryn Gertslııa qalasyna nemerem ekeýimiz qydyryp barǵan edik. Ol jaqta qyzym men kúıeý balam turady. Olar sol elde jumys isteıdi. Segizinshi qazan kúni qaıtýym kerek edi, soǵysqa baılanysty reıster toqtatyldy. Oılamaǵan jerden soǵys bastalyp ketti. Sırena oınaǵan kezde, bombadan qorǵanatyn jerde tyǵylyp otyrdyq. Qorqynysh boldy. Bizdi qıyn jaǵdaıǵa qaldyrmaǵan Qazaqstannyń Izraıldegi elshiligine, arnaıy reıs uıymdastyrǵan áýe kompanııasyna rahmet aıtqym keledi. Sol kisilerdiń arqasynda elge aman-esen oraldyq. Alaıda, qyzym men kúıeý balam sol jaqta qaldy. Endi solardy ýaıymdap turmyn», - dedi Aıgúl Ábdikerova.

Tel-Avıvten ushyp kelgen qazaqstandyq Artýr Kovalevskıı óz elin sheksiz maqtan tutatynyn aıtty.

«Biz sońǵy ýaqytqa deıin urys aımaǵynan tez ketemiz dep úmittendik, óıtkeni men eshqashan mundaı nárseni sezingen emespin – sırenanyń jaǵymsyz daýsy, jarylys óte qorqynyshty. Qatelespesem, Qazaqstan - óz azamattaryn shuǵyl qaıtaryp alǵan jalǵyz el. Chat, bári-bári dereý ashyldy. Onda mınıstrliktiń, Air Astana-nyń qyzmetkerleri jan-jaqty qoldaý kórsetti. Sol úshin de alǵysymyz sheksiz. Óz elimdi óte maqtan tutamyn», - dedi ol.

Sondaı-aq, kelgenderdiń arasynda «Bolashaq» baǵdarlamasy aıasynda taǵylymdamadan ótýge barǵan stıpendıattar bar.

Aınur Omarova Izraıldiń Haıfa qalasyna birinshi qazan kúni oqýǵa barǵan. Medıtsına salasy boıynsha bilimin jetildirýge attanǵan dárigerler sanaýly kún ǵana bilim aldy.

«Men «Bolashaq» baǵdarlamasy boıynsha Haıfa qalasyna taǵylymdamadan ótý úshin 1 qazanda bardym. Bári jaqsy bastalyp edi, biraq 10 kúnnen keıin osyndaı jaǵdaıǵa tap boldyq. Tótenshe jaǵdaıǵa baılanysty elden ketýge májbúr boldyq. Bári oıdaǵydaı bolyp, sol jerge qaıtamyz dep úmittenemiz. Óıtkeni, Izraılde medıtsına óte jaqsy damyǵan», - deıdi Aınur Omarova.

Semeı qalasynan Izraılge barǵan Úmit Jeldibaevanyń aıtýynsha, jergilikti halyq bas saýǵalaıtyn jer tappaı jatyr.

«Semeıden «Bolashaq» baǵdarlamasy boıynsha úsh aıǵa Izraıldiń Haıfa qalasyna oqýǵa bardyq. Negizi meniń taǵylymdamamnyń bitýine úsh apta ýaqyt qalǵan edi. Osy qaqtyǵysqa baılanysty bizdi otanymyzǵa qaıtardy. Tóbeden ushyp jatqan ushaqtar men sırenanyń daýysy, gýili úreı týdyrdy. Izraıldegi Qazaqstannyń ókiletti jáne tótenshe elshisi bizge jaqsy kómektesti. Páterimizdiń aldyna deıin kelip, alyp ketetin kólik uıymdastyryp berdi. Qorqynyshty jaǵdaıdy kózben kórdik. Halyq bas saýǵalaıtyn jer tappaı jatyr», - dedi Semeı qalasynan Izraılge barǵan Úmit Jeldibaeva.

Buǵan deıin 124 qazaqstandyq arnaıy repatrıatsııalyq reıspen elge jetkizilgeni týraly jazǵan edik.