Evakýatsııalanǵan halyqtyń ishinde 300-ge jýyq dáriger em-dom jasap júr

ASTANA. KAZINFORM — Densaýlyq saqtaý mınıstrliginiń resmı ókili Áıgerim Orazalıeva ortalyq kommýnıkatsııalar qyzmetinde ótken brıfıngide tasqyn saldary qatty sezilip jatqan 6 óńirde medıtsına mekemeleri kúsheıtilgen rejımde jumys istep jatqanyn málim etti.

«Elimizdiń medıtsınalyq uıymdary shtattyq rejımde jumysyn jalǵastyrýda. Sý tasqyny qıyn bolyp otyrǵan Atyraý, Aqtóbe, Aqmola, Batys Qazaqstan, Soltústik Qazaqstan, Qostanaı oblystary sekildi alty óńirde jedel medıtsınalyq kómek qyzmetteriniń, statsıonarlardyń qabyldaý bólmeleriniń jáne medıtsınalyq-sanıtarııalyq alǵashqy kómek uıymdarynyń jumysy kúsheıtildi. Іske qosylǵan 70 evakýatsııalyq pýnktide táýlik boıy dárigerler, orta medıtsınalyq personal kezekshilik etetin medıtsınalyq posttar ornalastyrylǵan. 300-ge jýyq medıtsına qyzmetkeri jumyldyrylǵan», — dedi ol.

Áıgerim Orazalıevanyń aıtýynsha, sý basqan aımaqtarda dári-dármekter men medıtsınalyq ónimderdiń qory jetkilikti.

«Sý basqan aımaqtarda ornalasqan statsıonarlarda barlyǵy 103 adam em alyp jatyr. Onyń basym bóligi Mańǵystaý jáne Atyraý oblystarynda. Olarǵa hırýrgııa, travmatologııa, akýsherlik jáne gınekologııa, pedıatrııa (sý tasqynyna baılanysty emes aýrýlar boıynsha) sııaqty beıinder boıynsha medıtsınalyq kómek kórsetiledi», — dedi mınıstrliktiń resmı ókili.