Evakýatsııalanǵan 2 myńnan astam aqmolalyq úılerine oraldy

KÓKShETAÝ. KAZINFORM – Aqmola oblysynda sý tasqyny kezinde evakýatsııalanǵan 2 myńnan astam turǵyn úılerine oraldy.

Aqmola oblysy TJD baspasóz qyzmetiniń málimetinshe, qazirgi tańda óńirdiń birqatar eldi mekenderinde tasqyn sýǵa qarsy turý jáne odan keletin shyǵyndy azaıtý, sondaı-aq, tabıǵat apanynyń saldaryn joıý jumystary júrgizilip jatyr.

«Qazirgi ýaqytta oblys aýmaǵynda sý tasqyny turaqty-shıelenisti rejımde ótip jatyr. Eldi mekenderdi qorǵaý úshin uzyndyǵy 44 myń metr topyraqtan úıilgen jasandy bógetter turǵyzylyp, nyǵaıtyldy. Buǵan qosa, 3 mln tekshe metrden astam sý soryldy, ınertti materıal toltyrylǵan 300 myńnan astam qap tóseldi, 85 shaqyrymnan astam kanaldar men aryqtar tazartyldy jáne tereńdetildi, 1443 sý ótkizý qurylystary tazartyldy», - dep túsindirdi vedomstvodan.

Aıtýynsha, qutqarýshylarǵa, polıtseılerge jáne jergilikti atqarýshy organdardyń ókilderine Malık Ǵabdýllın atyndaǵy azamattyq qorǵaý akademııasynyń kýrsanttary men ofıtserleri, sondaı-aq, volonterler men turǵyndar belsendilik tanytyp, kómektesýde.

«Sý tasqyny bastalǵannan beri óńirde barlyǵy 18 myńnan astam mal qaýipsiz jerge shyǵaryldy. Bul úı janýarlarynyń jappaı qyrylýyn aldyn alýǵa múmkindik berdi. Qazirgi atńda, evakýatsııalanǵan adamdardyń 2331-i óz úılerine oraldy, - dep qosty vedomstvodan.

Aıta ketsek, budan buryn Aqmola oblysynda Jabaı ózeninen tóngen qaýip seıilgenin jazǵan edik.