Evakýatsııalanǵandar sany 406 adamǵa jetti - ShQO
ÓSKEMEN. QazAqparat - Shyǵys Qazaqstannyń taǵy 4 aýdanynda sý tasqynyna daıyndyq rejimi kúsheıtildi, dep habarlaıdy QazAqparat tilshisi.
Oblystyq tótenshe jaǵdaılar departamentiniń baspasóz qyzmetiniń habarlaýynsha, oblys boıynsha qaýipsiz jerge kóshirilgen turǵyndardyń sany 406 adamǵa jetken. Onyń 135-i balalar. «Kúsheıtilgen daıyndyq» rejimi Kúrshim, Zyrıan, Ulan, Jarma aýdandarynda jarııalanyp otyr.
Baspanalaryn tastap shyqqan turǵyndardyń basym bóligi Glýbokoe aýdanynyń turǵyndary. Jergilikti ákimdik olarǵa aýdan ortalyǵyndaǵy jataqhanadan, Beloýsovka kentindegi aýrýhana men argrotehnıkalyq kolledjden, Progress jáne Predgornoe aýylynyń mektepterinen ýaqytsha baspana usyndy. 
«Evakýatsııalaý beketterinde zardap shekkenderge ystyq tamaq berilýde. Psıholog mamandar da moraldyq kómek kórsetý úshin jolǵa shyqty. Barlyq sý alǵan oryndarda sorǵytý jumystary úzdiksiz júrgizilip jatyr» - delingen tótenshe jaǵdaılar departamenti taratqan aqparatta.
Al Taýly Úlbi eldi mekeninde táýliktik kúzet qoıyldy. «Qazseldenqorǵaý» mekemesi ózen betindegi muzdardyń jyljýyn jiti baqylaýda ustap otyr. Muzdardyń keptelýi taǵy da ózenniń arnasynan asýyna sebepker bolýy múmkin degen qaýip bar. Qazir tolassyz jaýyn jaýyp, aýa temperatýrasy qaıtadan mınýsty kórsete bastady.
