EUÝ stýdentterine Tuńǵysh Prezıdent týraly dáris oqyldy
Jıyn Nur-Sultan qalasy ákimdiginiń bastamasymen uıymdastyrylǵan. Onda memleket jáne qoǵam qaıratkerleri, ǵalymdar, máslıhat depýttary Elbasynyń saıası jáne shyǵarmashylyq joly týraly oı-pikirler aıtyp, jastardyń qoǵamdaǵy orny men bolashaǵyn talqylady.
«QR Tuńǵysh Prezıdenti – Elbasy elimizdiń táýelsizdigin qalyptastyrǵan tulǵa. Elbasy negizin qalaǵan ishki jáne syrtqy saıasat nátıjesinde jas memleketimizdiń ekonomıkasy damyp, halyqtyń áleýmettik ál-aýqaty artty. Nursultan Ábishulynyń saıası erik-jigeriniń arqasynda elordamyz sonaý Almatydan Arqaǵa kóshirildi. Búginde bas qalamyz tek sáýletimen ǵana emes, dáýletimen de tanyldy. Astanamyzdyń dúnıejúzine tanylýyna Elbasynyń qosqan úlesi zor. Elbasyn elordamyzdyń arhıtektory dep aıtamyz. Onyń bastamalarynyń nátıjesinde elordamyzdyń iri halyqaralyq saıası-ekonomıkalyq, sporttyq, rýhanı sharalardyń ortalyǵy boldy. Sondaı-aq, álemdik tatýlyq pen birlikti nasıhattaıtyn qalaǵa aınaldy», - dedi Nur-Sultan qalasy ákiminiń orynbasary Baqtııar Máken «Elbasy jáne el muraty: turaqtylyq, jasampazdyq, sabaqtastyq» ǵylymı-praktıkalyq konferentsııasynda.
Onyń aıtýynsha, OBSE sammıti, Azıada, EKSPO-2017 sekildi iri halyqaralyq sharalar elordamen birge, elimizdiń deńgeıin kóterdi.
«Memleket basshysy Qasym-Jomart Toqaev prezıdent laýazymyna kiriskende elordany táýelsizdik pen Elbasy eńbeginiń jemisi dep atap, bas qalaǵa Nur-Sultan ataýyn berýdi usyndy. Prezıdenttiń bul sheshimin halyq qoldady. Tuńǵysh Prezıdent kúnin atap ótý – memleketimizdiń qalyptasýy men damýyndaǵy Nursultan Nazarbaevtyń eren eńbegine kórsetilgen qurmet», - deıdi B. Máken.
Óz kezeginde L. N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov atalǵan oqý ordasynyń negizin Elbasy qalaǵanyn atap ótti.
«Mine, osy zalymyz «QR Tuńǵysh Prezıdenti aýdıtorııasy» dep atalady. Zaldyń kireberis qabyrǵasyna kezinde Nursultan Ábishuly ózi ertip ákelip, dáris oqytqan álemdik saıası kóshbasshylardyń aty-jóni jazylǵan. Búgin tórde otyrǵan memleket jáne qoǵam qaıratkerleriniń bári – Elbasynyń saıası úzeńgilesteri. Osynsha tulǵanyń bizdiń ýnıversıtette qyzmet etýi – biz úshin ǵana emes, jańa tarıh úshin zor maqtanysh! Táýelsizdigimizdiń 28 jylyndaǵy turaqtylyq pen jasampazdyq, sabaqtastyq pen serpin – Elbasy Nursultan Nazarbaevtyń qaıtalanbas ári tarıhı mıssııasy, Otan aldyndaǵy abyroıly qyzmeti», - dedi Erlan Sydyqov.
Eske sala ketsek, 2011 jyldyń 10 jeltoqsanynda QR Parlamenti Senaty depýtattarynyń bastamasymen «Qazaqstan Respýblıkasyndaǵy merekeler týraly» QR Zańyna tolyqtyrý engizý týraly» QR Zańy qabyldanǵan bolatyn. Zań 1 jeltoqsanda atalyp ótiletin - Qazaqstan Respýblıkasynyń Tuńǵysh Prezıdenti kúnin belgilegen edi.
